Llapi e Ferizaj ndanë pikët në “Zahir Pajaziti”, në kuadër të ndeshjes mjaft interesante të javës së 33-të, të Superligës, të luajtur të enjten në Podujevë.
Për llapjanët kjo ishte një ndeshje e rëndësisë së lartë, pasi po luajnë për mbijetesë dhe për t’i ikur barazhit. Me pikën e fituar në shtëpi, ekipi i Tahir Batatinës ka 41 pikë në pozitën e tetë dhe vetëm 5 pikë larg Suharekës, kundërshtarit të radhës, në fundjavë.
Ferizaj që nuk ka pësuar humbje në gjashtë ndeshjet e fundit, aktualisht është në pozitën e katërt në tabelë, por me pikë të njëjta sa ka edhe Malisheva e treta.
“Ujqit” të parët udhëhoqën me golin e Erion Sadriut, në minutën e 61-të. Por që vendësit barazuan pas tetë minutave me golin e Ardit Tahirit nga pika e bardhë.
