Dueli tjetër gjysmëfinal i Kupës së Kosovës në futboll, luhet sot në Podujevë, ndërmjet Llapit nikoqir dhe Drenicës, ekipit nga kategoria e dytë.
Duke nisur nga ora 15:00 në stadiumin “Zahir Pajaziti”, adhuruesit e futbollit kanë mundësinë të shohin një nga duelet më të rëndësishme të sezonit, në veçanti për Llapin.
Ekipi i Tahir Batatinës është i parafundit në tabelë me vetëm 30 pikë, duke rrezikuar seriozisht edhe rënien, andaj Kupa është opsioni i vetëm i llapjanëve për të dalë në Evropë, nëse nuk do të kenë probleme në vazhdim të kampionatit.
Drenica në anën tjetër i prin grupit A, në Ligën e Parë për t’u rikthyer në Superligë, por me vetëm dy pikë më shumë se Trepça’89. Drejtuesit e klubit nga Skenderaj kanë rikthyer Bylbyl Sokolin trajner për t’i udhëheq ata drejt synimeve të sezonit.
Një ditë më parë në ndeshjen e parë gjysmëfinale, Prishtina triumfoi minimalisht ndaj Dritës në Gjilan për ta fituar aktin e parë.
