Të hënën, është mbyllur xhiroja e 31-të e Superligës së Kosovës në futboll.
Dy ndeshjet e fundit të kësaj xhiroje, janë zhvilluar në Podujevë dhe Ferizaj.
Në stadiumin “Zahir Pajaziti” në Podujevë, Llapi ka barazuar 1:1 ndaj Prishtinës kurse Ferizaj ka triumfuar 2:1 ndaj Dritës.
Ardit Tahiri e kaloi Llapin në epërsi pasi shënoi nga penalltia në minutën e 18-të, ndërsa Prishtina barazoi me anë të sulmuesit Leotrim Kryeziu në minutën e 70-të.
Me këtë barazim, si Prishtina ashtu edhe Llapi kanë nga 40 pikë të tubuara dhe ndajnë pozitat 6-të dhe 7-të në tabelë.
Ndërkohë, Ferizaj me këtë fitore të madhe ndaj Dritës është ngjitur në pozitën e katërt në tabelë me 45 pikë të grumbulluara.
Antonio Ilieski në minutën e 48-të dhe Fatjon Jusufi në minutën e 82-të, shënuan golat për fitoren e Ferizajt kurse për Dritën realizoi Veton Tusha në minutën e 80-të.
Përkundër humbjes, Drita mbetet në krye të tabelës me 66 pikë të mbledhura, nëntë më shumë se Ballkani që zë vendin e dytë.
