Skuadra e Llapit nuk e ka marrë më shumë se një pikë në ndeshjen e xhiros së 29-t të Superligës së Kosovës në futboll.
Të dielën, Llapi barazoi 1:1 në udhëtim te skuadra e Dukagjinit. Barazimi në Klinë ka bërë që Llapi të ngec në luftën për titullin e kampionit për shkak se tani ka katër pikë më pak se Ballkani që është lider. Llapi ka rënë në pozitën e tretë me 55 pikë, dy më pak se Drita që është e dyta dhe katër më pak se Ballkani.
Dueli i luajtur në stadiumin “18 Qershori” në Klinë ishte i fortë dhe më raste të shumta, por në fund nuk u shënuan me shumë se dy gola. Llapi avancoi në minutën e parë të kohës shtesë me anë të mbrojtësit Leotrim Bekteshi dhe me rezultatin 1:0 shkoi në pushim.
Megjithatë, Dukagjini u kundërpërgjigj me anë të mbrojtësit Ardin Dallku që shënoi në minutën e 66-të për ta vulosur rezultatin e takimit. Me këtë barazim, Dukagjini mbetet i gjashti në tabelë me 37 pikë por regjistron ndeshjen e katërt rresht pa humbje.
Të dielën, në stadiumin “Sami Kelmendi” në Lipjan është luajtur edhe dueli mes Fushë Kosovës dhe Malishevës. Malisheva fitoi me rezultatin 3:1 për t’u forcuar edhe më shumë në pozitën e katërt në tabelë me 52 pikë të mbledhura. Rilind Haziraj (13’), Drilon Hazrollaj (54’) dhe Ilir Mustafa (66’) shënuan për fitoren e Malishevës.
