KF Llapi nëpërmjet një komunikate të shtunën është ankuar se po dëmtohen padrejtësisht nga gjyqtarët.
Skuadra nga Podujeva u mposht sot 2:1 nga Ballkani, duke u thelluar edhe më shumë në krizë. Ka 17 pikë pas 17 ndeshjeve në vendin e tetë. Llapi nuk di për fitore në 10 ndeshjet e fundit (6 humbje, 4 barazime).
Por në komunikatë, së cilës i është bashkangjitur video me rastet e kontestuara, Llapi pretendon se tetë pikë u janë humbur nga vendimet e gjyqtarëve, veçanërisht e përmendin emrin e Mervan Bejtullahut.
Sipas skuadrës që drejtohet nga Tahir Batatina, ata janë dëmtuar në ndeshjen ndaj Dukagjinit, Ferizajt dhe sot ndaj Ballkanit.
“KF Llapi shpreh shqetësimin e thellë për vendimet e njëpasnjëshme të dyshimta dhe të paarsyetueshme që kanë ndodhur në ndeshjet e fundit, ku jemi dëmtuar padrejtësisht nga gjykimet tendencioze të gjyqtarëve. Pas analizave të bëra, kemi vërejtur se këto gabime nuk janë të rastit, por duket se janë rezultat i një menaxhimi të gabuar dhe të njëanshëm nga ana e FFK-së dhe gjyqtarëve. Në tri raste të veçanta, që i kemi përmbledhur në video, kemi humbur 8 pikë të vlefshme që kanë ndikuar rëndë në rendimentin tonë këtë sezon dhe kanë thelluar edhe më tej krizën në të cilën po kalojmë. Faktori kryesor në këto situata, tragjikisht, ka qenë Mervan Bejtullahu, i cili ka qenë i pranishëm në tri ndeshje: ndaj Dukagjinit si gjyqtar kryesor, ndaj Ferizajt dhe sot ndaj Ballkanit si gjyqtar në VAR, dhe ka ndikuar drejtpërdrejt në rezultatet e ndeshjeve, duke shkaktuar dëm të madh për skuadrën tonë. Bejtullahu me vendimet e tij të dyshimta ka dëmtuar skuadrën tonë në tri ndeshje: duke pranuar golin e Dukagjinit kur topi ishte në lëvizje si gjyqtar kryesor i ndeshjes, duke asistuar gjyqtarin kryesor, Genc Nuza, për një penallti të dyshimtë për Ferizajn, dhe duke asistuar sot gjyqtarin kryesor, Dardan Çaka, për penalltinë e akorduar për Ballkanin”, thuhet në komunikatë.
Llapi, duke ftuar të gjitha klubet, ka kërkuar takim urgjent pas përfundimit të sezonit me FFK-në për të diskutuar këto çështje.
“E kuptojmë frustrimin e tifozëve tanë që na mbështet, duke njohur krizën e rezultateve që po kalojmë. Megjithatë, kjo nuk mund të justifikojë dëmtimin e ekipit dhe ndershmërinë e garës për interesa personale të dikujt. Ne si klub kërkojmë transparencë dhe drejtësi. FFK dhe organet përkatëse duhet të mbajnë përgjegjësi për veprimet e tyre, dhe nuk do të pranojmë të qëndrojmë duarkryq përballë kësaj padrejtësie. Duhet të jetë e qartë për të gjithë se kjo mund të ndodhë në çdo moment, edhe për skuadra të tjera të elitës, dhe është e nevojshme të merret masa urgjente për të mbrojtur integritetin e futbollit kosovar. Për këtë arsye, pas përfundimit të sezonit, ftojmë të gjitha klubet e Albi Mall Superligës që të kërkojmë një takim urgjent me FFK-në për të diskutuar mbi këto çështje dhe për të kërkuar një zgjidhje të drejtë dhe të paanshme për të gjithë. Ne nuk do të heshtim, dhe do të vazhdojmë të luftojmë për një garë të pastër dhe të ndershme. Fundja, le të fitojë më i miri, por jo përmes gabimeve të gjyqtarëve që shërbejnë si ndihmë për klube të caktuara”, vijon komunikata.
