Kandidati i pavarur për kryetar të Komunës së Drenasit, Ramiz Lladrovci ka reaguar ndaj një deklarate të fundit të kandidatit të Partisë Demokratike për kryetar të Komunës së Skenderajt, Sami Lushtaku i cili gjatë një interviste tha se ‘As nuk e shoh Ramiz Lladrovcin, është një emër që nuk më bën përshtypje’.
Lladrovci ka deklaruar se reagimi i Lushtakut është i motivuar nga Partia Demokratike e Kosovës, e cila, sipas tij, e ka udhëzuar të mos konfrontohet me të, me qëllim që të mos i dëmtohet imazhi i partisë.
“Po tash nuk i bëj përshtypje sepse është instruktuar mos me u konfrontu me mua se po dëmtohet Partia Demokratike e Kosovës. Pse çfarë kujton ti? Një njeri me të cilin kemi kryer aksionet e para të Ushtrisë Çlirimtare të Kosovës, nga shtëpia ime jemi nisur së bashku me Sami Lushtakun, Hashim Thaçin, me Jakup Nurën me Ilmi Zekën, në aksionet e para në 92-ën kundër forcave serbe, edhe automatikun ia kam dhënë unë dhe tash të thotë nuk më bën përshtypje e nuk më intereson Lladrovci, ai është nivel i ulët. Mua më intereson gjithmonë. Unë e kam pasur mik. Po natyrisht që nuk i lë përshtypje, sepse edhe ai është njëri nga ata që i ka bërë më së shumti presion kryetarit të Partisë Demokratike të Kosovës për të më ndërruar”, ka thënë ai në emisionin “Këndi i Debatit” në Tëvë1./teve1.info/
