LIVE – Përpjekja e nëntë për konstituimin e Kuvendit

Tentativa e nëntë 

Në një përpjekje të re për të zhbllokuar krizën institucionale që ka paralizuar Kuvendin e Kosovës, dy liderët e partive më të mëdha politike kanë realizuar një takim para seancës së radhës parlamentare.

Takimi ka rezultuar pa ndonjë marrëveshje për konstituimin e Kuvendit.

Kuvendi vazhdon të mbetet në ngërç që nga seanca konstituive e 19 prillit.

Nga PDK e AAK i kanë bërë thirrje LVV-së të ndërrojë kandidaten duke e vlerësuar Haxhiun si figurë përçarëse.

Kurse, LDK ka thënë se nuk e voton asnjë të propozuar nga partia fituese e zgjedhjeve të 9 shkurtit.

LVV-ja deri më tash nuk ka ndryshuar qëndrim nga kandidatura e tyre duke thënë se opozita nuk mund t’ua imponojë kandidatin.

Krasniqi deklarohet pas takimit me Kurtin

“I thashë të mendojë për kandidatë të tjerë për kryeparlamentar”

Kryetari i Partisë Demokratike të Kosovës, Memli Krasniqi, ka folur para mediave pas takimit që ka zhvilluar me kreun e Lëvizjes Vetëvendosje, Albin Kurti.

“Kemi shkëmbyer ide dhe diskutime sa i përket konstitutimit të Kuvendit. Qëndrimet e Partisë Demokratike dhe të mijat janë ato që i dini”, ka thënë Krasniqi.

“Atë që e kam thënë pas çdo dështimi të seancës, ia kam thënë z. Kurti përsëri. Për PDK-në është me rëndësi të zhbllokohet kjo situatë, të konstituohet Kuvendi”, ka thënë Krasniqi.

Kreu i PDK-së ka bërë të ditur se Kurtit i ka sugjeruar “të mendojë për kandidat apo kandidatura të tjera” për kryetar të Kuvendit.

“Ne nuk kemi pasur qëndrim mohues apo bllokues. Nuk na takon neve t’ia zgjedhim kandidatin për kryetar të Kuvendit partisë së parë. S’kemi marrëveshje politike”, ka thënë Krasniqi.

Ai ka thënë se partia e tij është e gatshme të votojë “një figurë që mund të jetë e pranueshme”.

“Nënkryetarët as që diskutohen, as që lidhen me diskutimin për kryetar”, ka theksuar ai.

Krasniqi nuk ka pranuar të tregojë se çfarë i ka thënë Kurti në përgjigje.

Sipas Krasniqit, nëse Kurti do që ta zhbllokojë situatën, duhet ta ndërrojë sot emrin e kandidatit për kryetar të Kuvendit.

Deklarimet e deputetëve 

​Deputeti i LVV-së thotë se nuk do të heqin dorë nga emri i Haxhiut për kryeparlamentare

Deputeti i Lëvizjes Vetëvendosje, Mefail Bajqinovci, ka thënë se nuk do të heqin dorë nga emri i Albulena Haxhiut për kryetare të Kuvendit, përkundër takimit mes kryetarit të LVV-së, Albin Kurti dhe kryetarit të PDK-së, Memli Krasniqi, i cili po mbahet para vazhdimit të seancës konstituive që do të fillojë prej orës 10:00 të enjten.

Ai tha se shpreson që situata në Kuvend të zhbllokohet në seancën e sotme, derisa tha se takimi Kurti-Krasniqi fokusin e ka vetëm në zhbllokimin e legjislativit dhe nuk ka ndonjë indikacion për një koalicion qeverisës mes dy partive.

“Shpresoj që të zhbllokohen institucionet, në këtë rast Kuvendi i Kosovës. Kryeministri Kurti i ka dërguar ftesë dy partive opozitare, por po shohim që LDK-ja ka qëndrim kundër. Duke ditur se LDK-ja s’po ka kriter që të takohet me Porfirjen, shovinistin më të madh serb i cili menjëherë pas takimit me kryetarin e LDK-së shkoi në Rusi, ndërsa s’po ka asnjë mundësi që të takohet me kryeministrin Kurti për të zhbllokuar institucionet. Tashmë ka takim me PDK-në dhe të presim që legjislativi të zhbllokohet dhe të kemi kryetarin e Kuvendit, në këtë rast Albulena Haxhiu… Jo (koalicion qeverisës LVV-PDK). Mendoj se po diskutohet vetëm të zhbllokohet institucioni i legjislativit. Ky është hapi i parë pastaj për krijimin e qeverisë”, tha ai.