Qeveria e Lituanisë ka shpallur të martën një gjendje të jashtëzakonshme kombëtare, si reagim ndaj kërcënimeve të sigurisë që vijnë nga balonat meteorologjike të lëshuara nga Bjellorusia, aleate e Rusisë, të cilat kanë shkelur hapësirën e saj ajrore gjatë javëve të fundit.
Tensionet mes Lituanisë dhe Bjellorusisë janë rritur ndjeshëm, pasi këto balona kanë detyruar autoritetet lituaneze të mbyllin vazhdimisht aeroportin kryesor të vendit, duke shkaktuar bllokimin e mijëra udhëtarëve, shkruan AP.
“Në luftimin e sulmit hibrid bjellorus, ne duhet të marrim masat më të rrepta dhe të mbrojmë zonat më të prekura nga ky sulm”, tha kryeministrja Inga Ruginienë.
Vendimi u mor pas një mbledhjeje të kabinetit të shtetit baltik, i cili është anëtar i NATO-s dhe një mbështetës i vendosur i Ukrainës në luftën kundër forcave ruse që nisën pushtimin e plotë në shkurt 2022.
Ministri i Brendshëm, Vladislav Kondratoviç, deklaroi se shpallja e gjendjes së jashtëzakonshme do t’i japë ushtrisë të drejtën të patrullojë zonën kufitare së bashku me policinë dhe shërbimet e tjera të uniformuara, ose edhe në mënyrë të pavarur, me qëllim identifikimin e kërcënimeve.
Ndërsa balonat përdoren shpesh për kontrabandë të cigareve në Lituani, autoritetet në Vilnius i interpretojnë numrin dhe trajektoret e tyre si veprime të qëllimshme për destabilizim të organizuara nga Bjellorusia.
