Lista Serbe ka reaguar pas vendimit të ri të Bankës Qendrore të Kosovës që valuta e vetme e lejuar në Kosovë për kryerjen e transaksionit të pagesave me para të gatshme dhe në sistemin e pagesave në Republikën e Kosovës, të jetë euro.
Madje, e kanë akuzuar kryeministrin e vendit, Albin Kurti, se po synon “të dëbojë serbët pa përdorur armë”.
“Vendimi i regjimit të Albin Kurtit që nga 1 shkurti të ndalojë përdorimin e dinarit serb në Kosovë e M. është në fakt vendim për të dëbuar serbët nga këto zona pa përdorur armët”, ka shkruar Lista Serbe në Facebook. “Pasi janë përdorur gjitha format e dhunës institucionale kundër serbëve nga regjimi autoritar i Kurtit, dhe kanë dështuar të dëbojnë gjithë serbët nga Kosova e M., tash ka vendosur të ndalojë dinarin në Kosovë e M. dhe në mënyrë direkte rrezikon mbijetesën fizike të serbëve”, thuhet në reagimin e tyre.
Tutje, ata kanë thënë se duhet të jetë alarm për përfaqësuesit ndërkombëtarë që të veprojnë sa më shpejt për “ta ndaluar çmendurinë e Kurtit para se të jetë tepër vonë”.
