Të premten përfundon ultimatumi i Komunës së Mitrovicës së Veriut, për lirimin e objektit që përdoret nga strukturat paralele serbe në lagjen e boshnjakëve. Derisa ultimatumi po afron, Lista Serbe bëri të ditur sot se nuk e kanë ndërmend ta bëjnë një gjë të tillë.
Lista Serbe nuk tërhiqet. Thotë se nuk e lirojnë objektin e uzurpuar në veri.
Këtë të premte përfundon ultimatumi i Komunës së Mitrovicës së Veriut, që strukturat paralele të Serbisë ta lirojnë këtë objekt në lagjen e Boshnjakëve.
Aksioni për lirimin e objektit paralel që financohet nga Serbia, ishte paraparë të ndërmerret më 25 gusht, por që pas reagimeve nga Bashkësia Ndërkombëtare, i pari i Mitrovicës veriore, Erden Atiq, e shtyu vendimin për datën 8 shtator.
Mirëpo, përkundër paralajmërimeve, serbët lokalë duket se nuk e kanë ndërmend ta bëjnë një gjë të tillë.
Lista Serbe nëpërmjet një reagimi publik të mërkurën konfirmoi se nuk do ta lirojnë objektin dhe kërkuan ndërhyrje të Bashkësisë Ndërkombëtare.
“Duke pasur parasysh synimin e Prishtinës që me çdo kusht të vazhdojë me përshkallëzimin e situatës në terren dhe të pushtojë objektin në Mitrovicës, duam t’iu njoftojmë publikisht se refuzojmë ultimatumin e regjimit në Prishtinë për lëshimin e zyrave tona dhe kërkojmë që kjo çështje të zgjidhet në dialogun mes Beogradit dhe Prishtinës që ndërmjetësohet nga BE-ja dhe në kuadër të themelimit të Asociacionit të komunave me shumicë serbe, siç parashihet në marrëveshjet e vitit 2013 dhe 2015″.
Objekti në fjalë shërben për katër institucione që financohen nga Qeveria e Serbisë: Zyra për Kosovën, Drejtoria e Fondit për Sigurim Pensional dhe Invalidor, Qarku Administrativ i Mitrovicës së Kosovës dhe Qendra për Punë Sociale nga Vushtrria.
Derisa, këto institucione paralele e ilegale udhëhiqen nga disa prej anëtarëve më të lartë të Listës Serbe.
Por, se a do të ketë aksion për lirimin e objektit të premten – ashtu siç është dhënë paralajmërimi, nuk po e konfirmojnë zyrtarë të Qeverisë së Kosovës.
Përparim Kryeziu – zëdhënës i qeverisë Kurti zgjodhi heshtjen në pyetjen e tëvë1, njësoj si kryetari i Mitrovicës së Veriut, Erden Atiq.
Derisa institucionet vendore nuk po flasin, njësoj nuk po veprojnë ato ndërkombëtare.
Ambasada Amerikane javë më parë në reagimin e saj u bëri thirrje institucioneve kosovare që mos të ndërmarrin asnjë veprim që mund të përshkallëzojë situatën e sigurisë në katër komunat veriore të vendit.
Derisa, kjo të zgjidhet në çfarëdo forme, 40 punëtorët ilegalë të financuar nga Serbia, po vazhdojnë ta shfrytëzojnë objektin që është pronë e institucioneve të Republikës së Kosovës.
Autor: Arton Rama