Për vrasjen e një zyrtarit të UNMIK-ut dhe një zyrtari të Policisë në vitin 2004, Bedri Krasniqi u shpall i pafajshëm, derisa Alban Dezdari, mori 8 vite brugim. Shpallja e aktgjykimit u bë nën përcjellje të shumtë të Policisë.
Me përcjellje policore u soll në Gjykatën Themelore në Prishtinë.
Numër më i madh zyrtarësh dhe njësite elitare të Policisë ishin pozicionuar në hyrje të objektit të Departamentit të Krimeve të Rënda.
Në pozicione gatishmërie po ruhej hyrja e gjykatës.
Kjo meqë ndaj dy të akuzuarve për vrasjen e një zyrtari policor të UNMIK-ut dhe një zyrtari të Policisë së Kosovës, u shpall aktgjykimi.
Prezencë e shtuar e Policisë ishte edhe brenda gjykatores.
Në mungesë provash, Bedri Krasniqi u lirua nga akuzat, vrasje e rëndë dhe vrasje në tentativë.
I akuzuari tjetër, Alban Dezdari, u shpall fajtor duke u dënuar me 8 vjet heqje lirie.
Familjarët e Krasniqit e mirëpritën këtë aktgjykim, derisa shpresojnë në drejtësi të plotë.
Aktakuza e ngritur nga Prokuroria e EULEX-it, potencon se në vitin 2004 në Podujevë, të akuzuarit, kishin sulmuar një patrullë të UNMIK-ut, duke qëlluar me armë së paku 108 herë në drejtim të automjetit në të cilin gjendeshin katër persona.
Si pasojë e të shtënave një zyrtar policor i UNMIK-ut, Possible Essuman, dhe një zyrtar policor i Kosovës, Arsim Rrustolli, mbetën të vrarë, kurse lëndime morën dy zyrtarët tjerë.