Shpallja e aktgjykimit është bërë nga kryetari i trupit gjykues, gjykatësi Lutfi Shala, raporton “Betimi për Drejtësi”.
Sipas tij nuk është provuar se të njëjtit të kenë kryer veprat penale të cilat u vihen në barrë sipas aktakuzës së PSRK-së.
Shpenzimet e procedurës bien në llogarinë e mjeteve buxhetore të kësaj gjykate, ndërsa pala e dëmtuar udhëzohet në kontest civil.
“Ky është verdikti i gjykatës, ju e dini që për këtë çështje penale është vendosur njëherë me aktgjykim nga kjo gjyaktë, Gjykata e Apelit për shkak të një gabimi teknik që është lëshu në dispozitivin e aktgjykimit, çështjen e ka kthy në rivendosje e ne kemi vendos prapë për çështjen edhe arsyet pse e ka kthy Gjykata e Apelit janë për shkak se gjykimi për këtë çështje ka përfunduar në një afat shumë të shpejt kohor dhe kanë mëndu që ju kanë shkel të drejtat e palëve në procedurë”, shtoi në fund gjykatësi Shala.
Ndryshe, pas ankesës të ushtruar nga prokuroria, Gjykata e Apelit herën e parë më 25 janar 2022 e kishte kthyer rastin në rigjykim për shkak të shkeljeve esenciale procedurale.
Kjo çështje pasi është kthyer në rigjykim, të akuzuarit Halimi, Bytyqi, Musliu, Krasniqi dhe Daka ishin liruar nga akuzat për keqpërdorim të detyrës zyrtare.
Mirëpo, me arsyetimin se gjykata ka përfunduar shqyrtimin e rigjykimit brenda një kohe shumë të shkurtër dhe rrjedhimisht ka humbur kuptimin e mbajtjes së seancës, Apeli për herë të dytë e ka kthyer çështjen sërish në rishqyrtim.
Në vendimin e Gjykatës të Apelit, thuhet se procedura e shqyrtimit gjyqësor në rishqyrtim është e shkurtë deri në atë masë, sa që e ka cenuar esencën e seancës të shqyrtimit gjyqësor duke humbur kuptimin e mbajtjes se saj.
Sipas aktakuzës së Prokurorisë Speciale të Republikës së Kosovës (PSRK), të ngritur më 18 nëntor 2019, Bedri Halimi duke punuar si kryeinspektor i Inspektoratit të Ministrisë se Mjedisit dhe Planifikimit Hapësinor (MMPH), kompetent për inspektimin e punimeve ndërtimore në Parkun Nacional “Sharri” në Prevallë, me dashje nuk i ka kryer detyrat e domosdoshme të përcaktuara me vendimin e ministrit të MMPH-së Nr.34/13 të datës 15 nëntor 2013, me të cilin urdhërohet rrënimi i objekteve pa leje brenda Planit Rregullues Urban në Parkun Nacional, në atë mënyrë që edhe pse e ka hartuar planin për zbatimin e urdhëresës në 4 faza, atë nuk e ka përmbushur.
Sipas aktakuzës, në fazën e parë ishin rrënuar 180 objekte, në fazën e dytë nga 28 vendime për rrënim, janë zbatuar vetëm 20, duke mbetur edhe 8 vendime të pazbatuara.
