Prokuroria Themelore në Prishtinë ka liruar në procedurë të rregullt zyrtarin e Komunës së Prishtinës, Fadil Aliu-Hertica, ish-drejtorin e Qendrës për Punë Sociale, Vebi Mujku, dhe një zyrtar tjetër të kësaj qendre, ku të njëjtit ishin ndaluar me dyshimin për keqpërdorim të detyrës zyrtare.
Lajmin e ka bërë të ditur për teve1.info, zëdhënësja e Prokurorisë Themelore në Prishtinë, Laureta Ulaj.
“Ju njoftojmë se gjatë kësaj faze hetimore, Prokurori i Shtetit i ka ndërmarrë të gjitha veprimet e nevojshme hetimore për mbledhjen e provave personale dhe materiale, si dhe ka vlerësuar që rastin ta hetoj në procedurë të rregullt”, konfirmoi Ulaj.
Lidhur me këtë rast, gjatë ditës së sotme ka reaguar ish-drejtori i Qendrës për Punë Sociale në Prishtinë, Vebi Mujku, duke thënë se publikimi i arrestimit të tij dhe zyrtarëve të tjerë të komunës është bërë me qëllim.
Ai është deklaruar i pastër nga këto akuza, duke thënë se fjalën e fundit do ta vendos drejtësia.
“Përderisa për ato që është shkruar, mund të them se jam i pastërt si loti, për çka fjalën e fundit do ta thotë drejtësia. Vullneti, tentimi apo fuqia ime për të ndikuar në drejtësi është zero. Nuk do të ndalem në shërbim të drejtë dhe me integritet për vendin nga cilado pozitë që jam, sepse e kemi obligim profesional dhe moral”, ka shkruar Mujku në Facebook.
Të premten, Mujku, është ndaluar nga Prokuroria Themelore në Prishtinë, nën dyshimin se bashkë me dy zyrtarë të tjerë kanë punësuar rreth 10 persona në Qendrën për Punë Sociale./teve1.info/
