Janë liruar çmimet e biletave për finalen e Kupës së Kosovës në futboll, në mes të Gjilanit dhe Prishtinës, që do të zhvillohet më 5 qershor në stadiumin “Fadil Vokrri” në kryeqytet.
Fillimisht ishte njoftuar se biletat kushtonin nga 3 euro në jug dhe veri, 5 euro në lindje dhe 10 në perëndim.
Ndërsa, siç ka njoftuar Prishtina në Facebok, ka pasur kërkesë të të dyja klubeve për lirim të çmimeve dhe kjo është miratuar nga Komiteti Ekzekutiv i Federatës së Futbollit të Kosovës.
Tani biletat në tribunën perëndimore kushtojnë 5 euro, ato në lindore 3 dhe në jug e veri nga 2 euro.
Biletat do të dalin në shitje ditën e hënë (29 maj) dhe do të shiten në sistemin online.
Tifozët e Gjilanit do të vendosen në tribunën veriore, derisa “Plisat” e FC Prishtinës, do të vendosen në tribunën jugore. Për të dyja grupet e tifozëve, FFK do t’i ndajë nga 200 bileta falas.
Ndeshja do të zhvillohet më 5 qershor, në orën 18:00, në stadiumin “Fadil Vokrri” në kryeqytet.
