Ndeshja ndërmjet Lirisë dhe Drenicës, do të jetë derbi i Ligës së Parë dhe do të luhet sot prej orës 15:00 në stadiumin “Përparim Thaqi” në Prizren.
Kjo ndeshje i takon xhiros së 21-të, ndërsa është dueli kryesor jo vetëm në Grupin A por edhe në Grupin B të kategorisë së dytë të futbollit kosovar.
Drenica prinë në tabelë me 41 pikë, 5 më shumë se Liria që renditet në pozitën e katërt dhe të dyja skuadrat në këtë përballje futen pas humbjeve që i pësuan javën e shkuar.
Megjithatë, Liria ka treguar formë më të mirë pasi para humbjes ka një seri prej katër fitoreve rresht kurse Drenica në pesë xhirot e fundit ka tubuar vetëm 7 pikë.
Po ashtu, në krye të Drenicës ndaj Lirisë do të debutoj edhe trajneri i rikthyer Bylbyl Sokoli, i cili muaj më parë u shkarkua te skuadra nga Skenderaj.
Nën hijen e këtij derbi, në Grupin A do të luhen edhe tri ndeshje tjera: Vëllaznimi – Istogu, Trepça ’89 – Mitrovica, Besa – Rilindja 1974.
Tri ndeshje do të luhen edhe në kuadër të Grupit B: Vushtrria – Flamurtari, Dinamo – Kika dhe Vjosa – Fushë Kosova.
