Limani që nga shpallja e Pavarësisë së Kosovës është interesuar se pse Kosova nuk është pjesë e Eurovizionit.
Ai ka thënë që arsyet janë politike.
“Unë kam nisur një peticion në vitin e kaluar dhe deri më tani ka marr mbi 10 mijë nënshkrime që i bënë thirrje EBU-së që ta pranojë Kosovën në Eurovizion, arsyeja është që për shkak që RTK-ja duhet të anëtarësohet në EBU, në rrjetin e transmetuesve evropian, që pastaj të siguroj pjesëmarrjen në Eurovizion”, ka thënë ai.
Limani në Tëvë ka folur edhe për deklaratën e tekstshkruesit, Agim Doçi, i cili ka deklaruar se këngëtarët e Kosovës duhet ta përfaqësojnë Kosovën, e jo Shqipërinë në Eurovizon.
“Mendoj që mosha e bënë të vetën dhe deklaratat e tij janë shpeshherë të pamenduara, ai nuk është në dijeni ndoshta që Kosova nuk mund të merrë pjesë, edhe pse ka shkuar vetë në Eurovizon disa herë”, tha ai.
Sipas Limanit, deklarata e Doçit është shumë e ngutshme.
Tutje Limani tha se arsyeja se pse Kosova deri më tani nuk është pranuar në Eurovizon është kundërshtimi nga Rusia e Serbia.
Ai po ashtu tha se tashmë që Rusia është përjashtuar nga kjo organizatë, institucionet e Kosovës duhet të bëjnë më shumë që Kosova të pranohet në EBU ose në Eurovizion.
“Kosova nuk është pranuar në atë organizatë, për shkak të politikës, pikërisht për shkak se Rusia ka qenë një ndër kundërshtarët më të forta bashkë me Serbinë, tashmë që Rusia nuk është në atë organizatë për shkak të luftës në Ukrainë, mendoj që Kosova duhet të bëjë më shumë sidomos institucionet tona”, ka thënë Limani në Tëvë.
Limani ka theksuar se nëse Kosova anëtarësohet në Këshillin e Evropës nuk do të ketë pengesa për pranimin e Kosovës në Eurovizion.
Limani ka folur edhe për diskualifikimin e Ronela Hajatit në Eurovizon, duke thënë se atë e ka diskualifikuar juria profesionale e Eurovizionit.
“Duket që Ronelën e diskualifikoj juria profesionale e Eurovizionit, ku vetëm nga Greqia ka marrë pikë dhe nga asnjë juri tjetër e 17 shteteve sa kanë garuar në gjysmë finale”, ka thënë Limani.
Ndryshe, kosovarja Rona Nishliu përfaqësoi Shqipërinë në Eurovision Song Contest 2012 në Baku, Azerbajxhan, ku u rendit e pesta dhe arriti vendin më të mirë për Shqipërinë deri më sot.
