Kuvendi nuk u konstituua as të enjten.
Edhe kjo përpjekje që është e 23-ta me radhë nuk solli rezultat.
Deputetët e subjekteve politike nuk arritën asnjë marrëveshje për hapat tutje.
Por, temë diskutimi në hollin e kuvendit nuk ishte vetëm bllokada në parlament.
Kryetari i Partisë Demokratike të Kosovës foli edhe për bllokimin e rrugëve nga bizneset shkak i rrymës.
Edhe deputetja e Lidhjes Demokratike të Kosovës, Hykmete Bajrami foli për deklaratën e kryeministrit në detyrë, Albin Kurti në lidhje me protestën e paralajmëruara nga Oda Ekonomike dhe bizneset, ku tha se “koha e barrikadave ka kaluar”.
“Është turp që protestat e bizneseve, punëdhënësve më të mëdhenj të vendit, krahasohen me barrikada. Ndërkohë që Kurti nuk e thotë asnjë fjalë për koston prej 800 eurosh për transportin e 1 megavatit energji që e bën kompania e Vuk Hamoviqit – për të cilin ai dikur na ligjëronte kur ishte në opozitë”, u shpreh Bajrami.
E nga Aleanca për Ardhmërinë e Kosovës kanë thënë që bllokada në kuvend përfundon nëse Lëvizja Vetëvendosje propozon emrin e Saranda Bogujevcit, Shqipe Selimit ose Glauk Konjufcës për kryekuvendarë.
“Kemi dhënë zgjidhjet edhe s’kemi kërku asgjë nga VV-ja edhe ne që të kalojmë nga kjo situatë kemi dhënë tre emra të cilët do ti votonim Saranda Bogujevci, Shqipe Selimi dhe Glauk Konjufca nëse sot do të kishim njërin nga ata tre emra do ti votoni edhe sot për këtë erdhëm me shpresë që të ketë ndonjë ndryshim, as për Fatmir Limaj nuk është që kam informatë. Ajo çka është në interesim temin është me zgjedh kryetarin ose kryetaren edhe na kemi jep tre emra edhe nuk është se kemi bo bashkëpunim as me PDK-në edhe LDK-NË nëse Vetëvendosja nuk i ka votat për Qeveri mundet me blloku konstituimin e kuvendit të nënkryetar dhe kishim mundur me zgjedh kryetarin edhe do të jemi për”, tha Haradinaj
Por kjo javë nuk ka kaluar pa takime në mes përfaqësuesve të partive.
Kryetari i Nismës, Fatmir Limaj tha se është takuar për kafe me deputetin e Vetëvendosjes, Glauk Konjufca.
Madje sipas Limajt, ka një marrëveshje “xhentëlmene”e të pa shkruar.
“Unë jam i gatshëm që të takohem kurdo që kam ftesë, jam i gatshëm të takohem me të gjithë. Po kemi pi kafe me Glaukun, para dy dite, edhe mirë shumë. Konjufca është, ka qenë kryetar i Kuvendit, drejtues institucionesh, dhe është mëse normale të bisedojmë për zhvillimet. Është më se normale të bashkëbisedojmë për zhvillimet, për shqetësimet, për atë që sot Kosova është dhe është gjëja më normale që të bisedojmë dhe të trajtojmë tema se si të dalim nga kjo situatë”, u shpreh Limaj
Limaj tha se ditëve në vazhdim do të ketë takim edhe me të partin e LDK-së, Lumir Abdixhikun.
“Ditëve në vazhdim do të ketë një takim edhe me kryetarin Abdixhiku”, tha ai.
Por, punë më të rëndësishme se ky takim tha se ka ky i fundit.
“Ju lutem, kemi përpara punë të tjera”,tha kryetari i LDK-së.
E fajin për bllokadë edhe të enjten, partia fituese e zgjedhjeve, Lëvizja Vetëvendosje ia la opozitën.
Madje për deputetin Armend Muja, opozita më lehtë e ka pasur votimin e Zajednicës dhe Gjykatës Speciale sesa votimin e Albulena Haxhiut për krye-kuvendare.
“Qëllimet e PDK-së dhe partive opozitare janë që të bllokohet Kuvendi me qëllim që të parandalohet formimi i qeverisë Kurti, ne i dëgjojmë shumë deklaratat e opozitës në lidhje me këto dilemat e tyre për Haxhiun ka shumë deputet këtu të opozitës që nuk kishin fare dilema kur votuan për Zajednicën, kur votuan për demarkacionin dhe kur votuan për Gjykatën Speciale, dua të rikujtoj që Albulena Haxhiu nuk i ka votuar asnjërën prej tyre”, tha Muja.
Se edhe sa tentime do të ketë në Kuvend nuk e di as kandidatja për pozitën e krye-parlamentares, Albulena Haxhiu.
“Pyetni opozitën edhe sa herë”, tha Haxhiu.
