Kryetari i Nisma Socialdemokrate, Fatmir Limaj, ka arsyetuar deklaratën e kryeministrit të Shqipërisë, Edi Rama, i cili tha se toka e veriut është tokë e askujt.
Limaj, thotë se pjesa e veriut të Kosovës tash e një kohë është tokë e krimit, që sipas tij këtë ka dashur ta thotë edhe Rama.
“Toka jonë, pjesa e veriut të Kosovës tash e një kohë është tokë e krimit, nëse mund ta quaj, kur aty sundon krimi, bandat, besoj në këtë kuptim e ka pasur zotëri Rama. Ky është një fakt, që fatkeqësisht qytetarët, bashkëqytetarët tanë serbë dhe ne si Kosovë fatkeqësisht kanë qenë të ekspozuar nga bandat, pra ka qenë një parajsë, ku ligji e ka pasur të vështirë të zbatohet deri në fund, me gjithë përpjekjet. Ka pasur përpjekje të vazhdueshme për ta shtrirë, për ta normalizuar ligjërisht atë pjesë të territorit të Kosovës, por fatkeqësisht tani më dihet botërisht që në atë pjesë të Kosovës ka pasur hapësirë dhe ka pasur klimë, mundësi për zhvillimin e bandave kriminale. Unë kështu e shoh, besoj që edhe kështu zotëri Rama e ka thënë”, tha ai në emisionin “Info Nata” në Tëvë1.
Limaj për fund tha se çështja e veriut të Kosovës është kthyer në çështje sigurie.
“Çështja e veriut të Kosovës, nuk është më çështje politike, por edhe çështje sigurie”, shtoi ai./teve1.info/
