Ish-futbollisti i Kombëtares së Shqipërisë, Andi Lila ka përkrahur Evropianin U21 të vitit 2027 që do të mbahet në Shqipëri dhe Serbi.
UEFA, ditë më parë e konfirmoi Shqipërinë dhe Serbinë si organizatore të Evropianit U21 pasi kandidaturës së përbashkët që e kishin dorëzuar muaj më parë.
Me anë të një mesazhi, Lila ka thënë se organizimi i kësaj ngjarjeje së bashku me Serbinë është një nder i madh dhe moment historik.
“Të nderuar përfaqësues të federatave pjesëmarrëse. Është nder i madh për Federatën Shqiptare të Futbollit dhe Shqipërinë, që është zgjedhur së bashku me Serbinë si organizatore e Kampionatit Evropian U21 në vitin 2027. Ky është një moment historik për ne dhe mundësi unike për të dëshmuar aftësinë tonë për të pritur evente të nivelit ndërkombëtar. Shqipëria ka treguar se është e aftë për të organizuar aktivitete madhore si finalen e UEFA Conference League të vitit 2022”, ka shkruar Lila.
Ai ka thënë se emocionet duhet lënë anash pasi të gjithë duhet ta shijojnë një organizim të tillë.
“Ky kompeticion nuk është vetëm festë e futbollit, por edhe një mundësi për të nxitur zhvillimin e infrastrukturës dhe për të promovuar vlerat tona si mikpritjen, pasionin dhe dashurinë për lojën e bukur. “Ne dëshirojmë t’i tregojmë Evropës, jo vetëm aftësinë tonë për të organizuar, por edhe kulturën dhe bukuritë natyrore të vendit tonë.“Ju ftoj që krahas emocioneve të ndeshjeve, të shijoni Shqipërinë dhe të përjetoni nga afër traditën tonë të bujarisë dhe mikpritjes. Faleminderit UEFA, ju mirëpresim me krah-hapur”, ishte mesazhi i Lilës.
Megjithatë, Lila duket se ka harruar tmerrin e përjetuar në Beograd në vitin 2014 kur ishte pjesë e Kombëtares së Shqipërisë.
Madje, Lila ishte njëri prej protagonistëve në përleshjen mes futbollistëve të Shqipërisë dhe Serbisë, që ndodhi në fushë, kur edhe u ndërpre ndeshje.
Mbi të gjitha, pas kësaj ngjarjeje, Lila e vizitoi Prishtinën dhe u mirëprit nga të gjithë si një hero i vërtetë.
