Kombëtarja e Shqipërisë, sot do ta ketë testin e parë në prag të Kampionatit Evropian që nis këtë muaj në Gjermani.
Prej orës 20:00 në Hungari, Shqipëria do të përballet me Lihtenshtajnin në miqësoren e parë para nisjes për në Gjermani.
Shqipëria në fillim të javës së shkuar e ka nisur grumbullimin, ndërsa ditë më parë është zhvendosur në Austri për të vazhduar me fazën përgatitore nën urdhrat e trajnerit Sylvinho.
“Kuqezinjtë” të dielën kanë mbajtur stërvitjen e fundit në Austri, përpara miqësores me Lihtenshtajnin në Hungari.
Për Sylvinhon, miqësorja me Lihtenshtajnin është e rëndësishme për të parë ekipin nga afër, ndonëse në këtë ndeshje ka bërë me dije se përparësi do të kenë lojtarët që nuk kanë pasur hapësirë të madhe të Shqipëria.
E rëndësishme për Sylvinhon është se të gjithë lojtarët janë të gatshëm dhe se asnjëri prej tyre nuk ka shfaqur ndonjë problem gjatë fazës përgatitore.
Katër ditë pas ndeshjes me Lihtenshtajnin, Shqipëria do të luaj edhe një miqësore tjetër. Të premten do të përballet me Azerbajxhanin, po ashtu në Hungari por prej orës 19:00.
Pas duelit me Azerbajxhanin, Shqipëria do të zhvendoset në Gjermani për “Euro 2024”, ku duelin e parë do ta luaj kundër Italisë më 15 qershor.
