Kryetarja e Federatës së Sindikatave të Shëndetësisë në Kosovë, Tevide Imeri, ka folur lidhur me dërgimin e Ligjit për paga në sektorin publik në Gjykatën Kushtetuese.
Imeri vlerësoi që sa i përket sektorit të shëndetësisë, më e rëndësishme do ishte një plotësim ndryshim i ligjit.
“Po të pyetesha unë, nuk do ta çoja fare në Gjykatën Kushtetuese. Sa i përket sektorit të shëndetësisë, më me dëshirë do të kërkoja një plotësim ndryshim të ligjit, sepse nuk është i paprekshëm. Unë menjëherë do isha ndalur te infermierët që të bëhet një ngritje. Ne edhe si sindikatë kemi kërkuar një ngritje të koeficientit. Ne kemi menduar ta kërkojmë edhe pagën e 13-të, do të hyjmë me kërkesa shumë të mëdha, në mënyrë që nuk do të dalim pa diçka”, deklaroi Imeri në emisionin “Ditari” në Tëvë1.
E pyetur se a ka momentalisht një pagesë të rrezikshmërisë, Imeri tha se një gjë e tillë akoma nuk është e definuar qartë, përcjell teve1.info.
“Ndoshta do na marrë kohë diku 5-6 muaj derisa të rregullohen të gjitha problemet që janë me fillimin e implementimit të ligjit të pagave”.
Njëherit, tregoi se në pagat e muajit të kaluar, janë raportuar afër 1600 gabime teknike.
Ndërkaq, sa i përket takimit të mbajtur me Ministrin e Shëndetësisë, Arben Vitia, kryetarja e FSSHK-së, tha se Vitia u ka premtuar që do e bëjë maksimumin për t’i realizuar kërkesat e sektorit të shëndetësisë.
“Kryesisht takimet me ministrin e shëndetësisë i kemi të rregullta, e sidomos kur kemi ndonjë kërkesë më të veçantë, i kemi edhe më të shpeshta. Në rastin konkret, kemi biseduar për formimin e grupeve për dialog social dhe i kemi formuar ato grupe, njëherit do të fillojnë shumë shpejt”, tha më tej Imeri.
Në përgjithësi, Avokati i Popullit konsideron se Ligji për pagat në sektorin publik dhe Shtojca një (1) e këtij ligji nuk kanë arritur ta bartnin frymën kushtetuese në kuptimin e ndarjes së pushteteve, të barazisë para ligjit dhe as garantimin e së drejtës pronësore. Për më shumë, Avokati i Popullit konsideron se ky ligj nuk është në pajtim me parimet e sundimit të ligjit, për shkak të mangësive në kuptimin e qartësisë, saktësisë dhe parashikueshmërisë së tij./teve1.info/.
