Mesfushori dhe kapiteni i Zvicrës dhe Sunderlandit, Granit Xhaka u bë lajm ditëve të fundit, jo për aftësitë e tij futbollistike, por për fishkëllimat që i mori në stadiumin “Fadil Vokrri” në Prishtinë.
Xhaka dhe ‘shokët’ e tij nga kombëtarja e Zvicrës luajtën gjatë të martës në kryeqytetin e Kosovës, për ndeshjen e fundit të kualifikimeve të Botërorit, ndaj Kosovës, teksa mesfushori 33-vjeçar fishkëllohej sa herë e prekte topin në fushë.
Kjo duket se erdhi si pasojë e deklaratave të tij ndaj dyshes Albian Hajdarit dhe Leon Avdullahut – që zgjodhën Kosovën përa Zvicrës – duke thënë se dyshja në fjalë nuk u treguan të durueshëm për të pritur kombëtaren helvetike.
Pasi e përjetoi atë natë të ‘rëndë’, tashmë babai i tij, Ragip Xhaka i ka kushtuar një postim, mjaft emocionues në rrjetet sociale.
Çdo hap që kam hedhur nga Kosova deri në Zvicër, çdo vendim që kam marrë, e kam bërë duke menduar për ty dhe për Taulantin.
Pse?
Sepse desha që ju të rriteni të drejtë, të ndershëm, të fortë dhe të paepur. Desha t’ju mësoj të përballeni me çdo sfidë dhe çdo sakrificë, dhe ju e keni bërë këtë me nder e me karakter.
Jam krenar, biri im.
Desha që ta donit veten, familjen dhe atdheun e të parëve tanë dhe ju e bëni këtë çdo ditë.
Ju mësova si luftohet e si qëndrohet përballë më të këqijve, dhe sa herë ua solli jeta beteja të vështira, ju u ngritët më të fortë.
Sa herë që dikush nuk ju ka dashtë, ju keni falenderuar. Dhe në fund, ju prapë ju kanë dashtë sepse zemra e madhe fiton gjithmonë.
Për gjithçka që jeni dhe gjithçka që keni bërë, unë jam krenar pa masë me ju.
Ju jeni dhe do të mbeteni dy zemrat e krenarisë sime.
Me shumë dashuri,
Babi
