Bashkësia Islame e Kosovës hapi dyert për mysafirë për festen e Kurban Bajramit
E në këtë ditë, i pari që u shkoi për vizitë ishte kryetari i Aleancës për Ardhmërinë e Kosovës, Ramush Haradinaj.
“Me rastin e festës, siç tregoi edhe myftiu, është dëshmuar një solidaritet I madh I ndërsjellë dhe janë gëzuar shumë familje. Ne kemi plot sfida në vend, uroj që të na i hap Zoti rrugët si popull sepse vërtetë e meritojmë zhvillimin”, tha kreu i AAK-së
Pas tij, në vizitë ishte edhe kryeministri në detyrë, Albin Kurti.
Kurti uroi festën dhe theksoi rëndësinë e solidaritetit dhe ndihmës për të varfërit.
“Urime festa e Kurban Bajramit sot dhe jo vetëm sot. Le të ndihmojmë ata që kanë më së shumti nevojë dhe ta përkujtojmë rëndësinë që ka sakrifica dhe solidariteti për një shoqëri të mirë dhe të drejtë. Paçit tryezat përplot me miq”, u shpreh Kurti.
Këtu erdhi edhe deputeti i Partisë Demokratike të Kosovës, Abelard Tahiri i cili tha se Bashkësia Islame ka dhënë kontribut në shtetndërtim.
“Kjo ditë e sakrificës, është kur duhet të gjendemi pranë atyre që janë në nevojë dhe kalojnë momente të vështira në vendin tonë. Po ashtu, angazhimin tonë do ta kujtojmë që ta kemi për shtetin e Kosovës, për ndërtimin e institucioneve të fuqishme, si shtet në ndërtim e sipër”, tha Tahiri
Urime pati edhe nga kryetari i Lidhjes Demokratike e Kosovës, Lumir Abdixhiku.
Myftiut Tërnava festën ia uroi edhe Ismet Krasniqi, këshilltari i presidentes, Vjosa Osmani.
Derisa kjo e fundit në një postim në Facebook, ka thënë se Kurban Bajrami është thirrje për reflektim mbi vlerat më të larta njerëzore.
“Kjo festë shpërfaqë shpirtin e solidaritetit, na kujton rëndësinë e sakrificës, përkushtimit dhe ndihmës ndaj njëri-tjetrit. Kurban Bajrami është një thirrje për reflektim mbi vlerat më të larta njerëzore dhe për forcimin e lidhjeve, dashurisë dhe mirëkuptimit ndërmjet nesh”, ka shkruar Osmani.
Në pritjen për urime të organizuar nga BIK, për vizitë ishte edhe ambasadori i Turqisë në Kosovë, Sabri Tunç Angılı i cili tha se Turqia gjithmonë është pranë popullit shqiptar dhe se kanë një bashkëpunim të ngushtë me Bashkësinë Islame.
