Liderët opozitarë kanë shprehur ngushëllime për vdekjen e kryetarit të Qendrës Burimore për Personat e Pagjetur.
Kryetari i LDK-së, Lumir Abdixhiku ka thënë se trashëgimia e Qerkinit për drejtësi dhe lufta e palodhur për të gjithë të zhdukurit, do të mbeten në histori për breza të tërë.
“I trishtë lajmi për ndarjen nga jeta, të veprimtarit të madh, Bajram Qerkini i cili asnjëherë nuk e ndali zërin e nuk u lodhë kurrë me vite të tëra, duke kërkuar drejtësi për personat e zhdukur nga lufta në Kosovë. Bajram Qerkini, dhimbjen për djalin e tij të zhdukur, e ktheu në forcë e angazhim personal, duke u bërë zë për të gjitha familjet e tjera, të cilat jetonin me të njëjtën plagë, si të tij. Plagë mbi të cilën Bajrami, si simbol i rezistencës dhe guximit, punoi rreth 25 vite rradhazi, në kërkim të së vërtetës për fatin e të dashurve të tyre të zhdukur. Në emrin tim personal dhe të gjithë anëtarësisë së Lidhjes Demokratike të Kosovës, ju shpreh ngushëllimet më të sinqerta familjes Qerkini, miqve dhe të gjithë atyre që e njohën dhe punuan me të. Humbja e bacës Bajram thellohet edhe më shumë, kur ai u nda nga kjo jetë pa mësuar për fatin e djalit të tij dhe shumë të zhdukurve të tjerë. Por trashëgimia e tij për drejtësi dhe lufta e palodhur për të gjithë të zhdukurit, do të mbeten në histori për breza të tërë. I lehtë të qoftë dheu i Kosovës”, ka shkruar Abdixhiku në Facebook.
Kryetari i PDK-së, Memli Krasniqi ka thënë se kauza e Qerkinit i cili ishte fuqia e prindërve në pritje dhe zemra e një populli që ende pret drejtësi do të mbetet amanet i përjetshëm.
“Me dhembje të thellë morëm lajmin për vdekjen e Bacës Bajram Qerkini. Ai nuk ishte thjesht Kryetari i Shoqatës “Zëri i Prindërve”, ai ishte fuqia e prindërve në pritje dhe zemra e një populli që ende pret drejtësi. Baca Bajram nuk i gjeti kurrë eshtrat e djalit të tij, Reshatit. Ai jetoi me atë dhembje dhe e shndërroi në forcë, në këmbëngulje, në një betejë të pandalshme për të vërtetën, kujtimin dhe drejtësinë. Kauza e Bacës Bajram, ashtu si edhe e qindra bashkëkombësve tanë të tjerë, mbetet amanet i përjetshëm. Nuk do t’i harrojmë ata që mungojnë dhe nuk do të ndalemi së kërkuari drejtësi për ta. I lehtë të qoftë dheu i Kosovës. Pusho në paqe, Bacë”, ka shkruar Krasniqi në Facebook.
Ndërsa, kryetari i AAK-së, Ramush Haradinaj ka thënë se baca Bajram do të kujtohet si njeri i urtë, i fortë dhe i palëkundur në kërkimin e së drejtës.
“I pikëlluar nga lajmi për ndarjen nga jeta të Bajram Qerkinit, plakut të urtë që kurrë nuk u ndal së kërkuari të vërtetën për fatin e djalit të tij të zhdukur dhe të gjithë të zhdukurve tjerë. Iku nga kjo botë pa e mësuar se çfarë ndodhi me të birin dhe me shumë të tjerë, të cilët ende sot nuk dihet ku janë. Baca Bajram do të kujtohet si njeri i urtë, i fortë dhe i palëkundur në kërkimin e së drejtës. Do e vazhdojmë rrugën e tij e s’do ndalemi së kërkuari drejtësi. Ngushëllime familjes Qerkini, miqve dhe të gjithë atyre që e njohën”, ka shkruar Haradinaj në Facebook.
Kryetari i Shoqatës “Zëri i Prindërve”, Bajram Qerkini është ndarë nga jeta të hënën pas një sëmundje. Ai përreth 25 vjet është angazhuar për zbardhjen e fatit të djalit të tij, Reshatit, si dhe personave të tjerë të zhdukur gjatë luftës në Kosovë./teve1.info/
