Liderët e vendeve anëtare të NATO-s janë zotuar të investojnë deri në 5% të Prodhimit të Brendshëm Bruto (PBB) për vit në mbrojtje dhe siguri deri në vitin 2035, sipas deklaratës përfundimtare të samitit të Hagës të miratuar sot.
Sipas dokumentit, vendet anëtare do të paraqesin “plane vjetore” që do të tregojnë një rrugë të besueshme dhe të përshkallëzuar për të arritur këtë objektiv, ndërsa një rishikim më gjithëpërfshirës i progresit do të bëhet në vitin 2029, raporton “The Guardian”
Deklarata pesë-pikëshe riafirmon gjithashtu angazhimin e hekurt të 32 vendeve anëtare ndaj mbrojtjes kolektive të përcaktuar në nenin 5 të Traktatit të Uashingtonit – se një sulm ndaj njërit është sulm ndaj të gjithëve.
Dokumenti përfshin edhe një zotim për mbështetje të mëtejshme për Ukrainën, duke theksuar se “siguria e saj kontribuon në sigurinë tonë”, megjithatë nuk përmban një dënim të drejtpërdrejtë ndaj Rusisë.
Megjithatë, deklarata përmend në mënyrë të veçantë “kërcënimin afatgjatë që paraqet Rusia për sigurinë euroatlantike”.
