Liderët botërorë kanë shprehur të hënën ngushëllimet e tyre me rastin e vdekjes së Papa Franceskut, të hënën.
Presidenti i Argjentinës, vendlindja e Françeskut, ka shprehur ngushëllime dhe ka theksuar rolin e tij për promovimin e dialogut ndërfetar.
Ai e ka quajtur Argjentinën si “tokën e Papa Françeskut”.
Ngushëllime ka dërguar edhe udhëheqësja e Bashkimit Evropian e cila kujtoi Françeskun si frymëzim për të gjithë botën.
“Sot, bota mban zi për vdekjen e Papa Françeskut”, shkroi von der Leyen, në X.
Edhe presidenti Macron ndau ngushëllimet e tij në një postim në X.
“Nga Buenos Aires në Romë, Papa Françesku donte që Kisha t’u sillte gëzim dhe shpresë më të varfërve. Që ajo të bashkonte njerëzit mes tyre dhe me natyrën. Le të zgjasë përgjithmonë kjo shpresë.
Ngushëllime kanë shprehur edhe liderë të tjerë evropian duke e cilësuar Françeskun si “njeri i popullit.”
Në një letër ngushëllimi, presidenti rus, Vladimir Putin vuri në dukje ndikimin ndërkombëtar të Papës si një “mbrojtës i vazhdueshëm i vlerave të larta të humanizmit dhe drejtësisë”.
Presidenti i Ukrainës, Volodymyr Zelenskyy thotë se vendi i tij është i pikëlluar së bashku me katolikët dhe të gjithë të krishterët që kërkuan nga Françesku mbështetje shpirtërore.
Edhe Mbreti Charles III lavdëroi Papën e ndjerë për punën e tij në mbrojtjen e planetit, duke thënë se ai kishte prekur thellësisht jetën e shumë njerëzve.
“Përmes punës dhe kujdesit të tij për njerëzit dhe planetin, ai preku thellësisht jetën e kaq shumë njerëzve,” tha Charles. “Mbretëresha dhe unë kujtojmë me dashuri të veçantë takimet tona me Shenjtërinë e Tij gjatë viteve dhe ne u prekëm shumë që patëm mundësi ta vizitonim atë në fillim të muajit.”
Nënkryetari i SHBA JD Vance, i cili kishte takuar Papa Françeskun të dielën e Pashkëve, tha se “zemra e tij është me miliona të krishterë në mbarë botën që e donin atë”.
Kurse, lideri pakistanez, vdekjen e Françeskut e ka quajtur humbje për komunitetin global dhe e ka cilësuar atë si pionier të harmonisë ndërfetare.
Një peshkop në Abu Dhabi, duke përkujtuar me mirënjohje vizitën e fundit të Papës në Emiratet e Bashkuara më 2019, ju kërkoi të gjitha famullive atje të planifikonin një meshë për Françeskun.
Ndërkohë, Vatikani po bën përgatitjet për ritualet e para pas vdekjes së Françeskut, ka raportuar AP.
Trupi i papës pritet të transferohet brenda ditës në kapelën e hotelit, Domus Santa Marta ku ai jetonte, në mënyrë që zyrtarët e Vatikanit të bëjnë nderimet e fundit.
Aty shefi i shërbimit shëndetësor të Vatikanit ekzaminon trupin, konstaton shkakun e vdekjes dhe shkruan një raport që pritet të hënën vonë.
