Edhe para fillimit të derbit të mbrëmshëm, klubi katalanas nuk kishte asnjë shans për të kaluar në 1/8 e Champions League pasi Interi mposhti bindshëm 4:0 Viktoria Plzeň në shtëpi dhe siguroi vendin e dytë në grup.
Në qendër të vëmendjes pas ndeshjes së mbrëmshme ka qenë veçanërisht Lewandowski, i cili në një periudhë të shkurtër e ka luajtur ndeshjen e dytë kundër ish klubit të tij nga i cili mbërriti në Barcelonë këtë verë.
Megjithatë, polaku nuk bëri asgjë në dy takimet kundër Bayernit dhe mbeti totalisht nën hijen e mbrojtësve të klubit të Mynihut, dhe për t’i bërë gjërat më keq për të, Xavi e nxori nga loja në pjesën e dytë.
Pas ndeshjes, Lewandowski vendosi të vizitojë ish-shokët e tij dhe shkoi në dhomat e zhveshjes së Bayernit për t’u përshëndetur.
Sulmuesi polak ka qëndruar për disa minuta në dhomat e zhveshjes së Bayernit dhe ka biseduar shkurt me ish-bashkëlojtarët e tij, por edhe me drejtuesit e klubit, mes të cilëve edhe Hasan Salihamidzic.
“Lewa erdhi në dhomën tonë të zhveshjes pas ndeshjes. Ne patëm një bisedë të shkurtër, por nuk u futëm në asnjë detaj. Ai është një djalë i mrekullueshëm dhe i uroj vërtet të gjitha të mirat në të ardhmen”, tha Salihamidzic pas ndeshjes.
Gjithashtu, Thomas Muller ka konfirmuar se Lewandowski i ka vizituar pas ndeshjes, por ka thënë se i vjen keq për ish-sulmuesin e Bayernit.
“Ai na vizitoi dhe erdhi për të na përshëndetur, që është një lëvizje e mrekullueshme. Është gjithmonë mirë ta shoh dhe të flas me të. Sigurisht, më vjen pak keq për të për shkak të gjithçkaje që po i ndodh Barcelonës, sepse e di sa ambicioz është ai është futbollist”, ka thënë Muller.
