Drejtuesit e Bayer Leverkusenit ia kanë rritur çmimin mesfushorit Florian Wirtz pas interesimit të madh nga Real Madridi, Manchester City e Bayern Munichu për shërbimet e tij. Mesfushori gjerman pritet të qëndrojë te Leverkuseni deri në fund të edicionit, ndërsa për lirimin e tij në verë ekipi gjerman po kërkon hiç më pak se 130 milionë euro.
20-vjeçari po shkëlqen këtë edicion dhe është ndër lojtarët më të vlerësuar në Gjermani. Në 24 ndeshje të luajtura në të gjitha garat deri më tani, Wirtz ka shënuar tetë gola dhe ka bërë 12 asistime.
Ai prej vitit 2020 është pjesë e ekipit të parë të Leverkusenit, me të cilin ka kontratë deri në verën e vitit 2027. Po ashtu Wirtz ka edhe 14 paraqitje me Përfaqësuesen e Gjermanisë.
