Organizata e Veteranëve të Luftës së UÇK-së (OVL-UÇK) i ka drejtuar një letër ministres në detyrë të Drejtësisë, Albulena Haxhiu, duke kërkuar sigurimin e menjëhershëm të mjeteve financiare për mbrojtjen juridike të të burgosurve në Dhomat e Specializuara në Hagë.
Në letrën e dërguar, OVL-UÇK shpreh shqetësimin e thellë për mungesën e mbështetjes institucionale, duke e konsideruar këtë si një mangësi serioze që ndikon negativisht në përfaqësimin ligjor të ish-pjesëtarëve të UÇK-së që po përballen me akuza në Hagë.
“Proceset që po zhvillohen në Hagë ndaj ish-pjesëtarëve të UÇK-së përfaqësojnë jo vetëm individët, por edhe historinë e drejtë të luftës sonë çlirimtare. Mbrojtja adekuate dhe profesionale e tyre është një domosdoshmëri themelore e drejtësisë dhe një detyrim moral e institucional i Republikës së Kosovës,” thuhet në letrën e organizatës.
OVL-UÇK i bën thirrje Qeverisë së Kosovës dhe Ministrisë së Drejtësisë që të veprojnë urgjentisht në ndarjen e mjeteve të nevojshme financiare, duke nënvizuar se kjo është një përgjegjësi e drejtpërdrejtë për ruajtjen e dinjitetit të luftës çlirimtare dhe të drejtësisë për të gjithë të përfshirët në këto procese gjyqësore.
Në letrën e plotë, organizata përfshin edhe kërkesa të tjera që lidhen me garantimin e një procesi të drejtë gjyqësor dhe respektimin e të drejtave të të akuzuarve.
