Një aksident trafiku mes dy veturave ka ndodhur sot në rrugën Gjakovë – Prizren.
Bëhet e ditur se si pasojë e këtij aksidenti kanë mbetur të lënduar njëri prej shoferëve të automjetit, dhe dy këmbësorë të rastit, të cilët u goditën nga veturat e aksidentuara.
Lajmin për tëvë1.info e ka konfirmuar zëdhënësi i Policisë, Sheremet Elezi.
Sipas Elezit, këmbësorët dhe njëri nga drejtuesit e automjetit janë dërguar për trajtim në Spitalin Rajonal në Gjakovë.
“Rreth orës 12:20 kemi pranuar informatën se në fshatin Rugovë (rruga Gjakovë-Prizren), ka ndodhur një aksident trafiku me lëndime. Në këtë aksident kanë qenë të përfshira dy automjete dhe dy këmbësorë. Deri më tani 3 persona (dy këmbësorët dhe njëri nga shoferët e automjeteve) janë dërguar në Spitalin Rajonal-Gjakovë për trajtim mjekësor. Rasti vazhdon të hetohet nga Njësia Rajonale e Komunikacionit Rrugorë”, tha ai./teve1.info./
