Fillimisht ai shprehu ngushëllime për vdekjen e ish-sekretares Albright, duke thënë se ajo ka qenë një mike e madhe e Kosovës dhe e popullit shqiptar në përgjithësi, por se edhe bota ka humbur një diplomate të shquar.
Ndërsa, ka kritikuar moszgjedhjen anëtarëve të bordit të OShP-së.
“Mendoj që është e qëllimshme që Qeveria Kurti nuk është duke zgjedhur anëtarët e bordit, sepse nëse e marrim Organin Shqyrtues të Prokurimit Publik, mendoj që është një segment i rëndësisë së veçantë, kanë ngecur shumë kontrata, shumë ankesa, dhe ndoshta në këtë mjegulli Qeveria Kurti e shfrytëzon që mos t’a bëjë funksionale, sepse sa do që të thuhet që jemi duke punuar, ne kemi pasur një trup përzgjedhës të antarëve të bordit. Mirëpo nga shumica, nga pozita është hedhur poshtë, dhe nuk u kanë besuar gjyqtarëve që i përzgjedh, dhe kjo lë shumë për të dëshiruar sepse nuk janë të vetëdijshëm sa po humb Kosova, po ashtu ne kemi pasur dje anëtar të Autoritetit të Konkurrencës që ka ardhur Qeveria në komisionin tonë që i ka deleguar, dhe mendoj që edhe pse ata i ka deleguar vetë Qeveria zyra ligjore ka konsideruar që janë të paligjshme, dhe mendoj që nuk janë zgjedhur sipas procedurave dhe sipas konkursit. Ata na kanë lutur që t’i votojmë dhe të përshpejtojmë procedurën për t’i dërguar në Kuvend, mirëpo pas dy ditëve ka ardhur vendimi nga zyra ligjore që ka shkelje të procedurave. Prandaj nëse një Qeveri gabon kështu, një Qeveri që dy segmente që janë kyçe, edhe Autoriteti i Konkurrencës, dhe organi shqyrtues i prokurimit publik nuk janë funksionale kjo le të kuptosh që janë të qëllimshme dhe që ndikon negativisht në funksionimin e gjithmbarshëm që quhet edhe tregu edhe Gjykata e Tenderëve”, deklaroi Lekaj.
Ai tha se qëllimi i Qeverisë Kurti është 100 përqind politik për shkak se nuk kanë mundur t’i përzgjedhin njerëzit politik të tyre, edhe pse është në kundërshtim me ligjin, dhe se kjo është drejtë për drejtë kapje e shtetit.
“Edhe pse na kanë sjellë 3 gjyqtarë në panelin intervistues, atyre nuk u kanë besuar vetë Pozita, është çështje besimi, për shkak se nuk kanë mundur t’i përzgjedhin njërëzit e tyre politik edhe pse është në kundërshtim me ligjin, qëllimi është 100 përqind politik, përndryshe është dashur të votohet sepse kanë qenë profesionistë dhe mendoj që ne i kemi votuar si Opozië, mirëpo nuk kanë marrë mbështetje nga shumica e deputetëve që vijnë nga Pozita.Mendoj që kjo është drejtë për drejtë kapje e shtetit, ata na kanë kritikuar 20 vite neve, mirëpo po shihet që duke u nisur nga punësimet dhe nga shkarkimet është krejtësisht e kundërta në atë që kanë premtuar, dhe mendoj që nuk kanë realizuar as 10 përqind të qeverisjes së tyre”, deklaroi tutje ai.
Sipas tij, në këto mbi 20 vite lirie është punuar shumë dhe nuk ka pasur vetëm shkatërrime, siç thotë Vetëvendosje.
“Nëse thuhet që 20 vite ka pasur në këtë vend vetëm shkatërrime, keqpërdorim, mendoj që nëse e bëjmë një krahasim në 20 vite ku kemi qenë dhe ku jemi tani, jemi 1000 përqind shumë më mirë, sepse kemi pasur një luftë, do të thotë s’kemi pasur shtet, tani e kemi shtetin. Nuk kemi pasur institucione, tani i kemi institucionet. Nuk kemi pasur ndërtime, tani kemi ndërtime. Nuk kemi pasur infrastrukturë, tani pothuajse jemi më të mirët në rajon. Mendoj që këta do ta kryejnë qeverisjen duke vajtuar, duke shajtur, duke mos pranuar asgjë ekzistuese, ata kanë thënë në zhargonin e tyre politik që do t’a formojnë Republikën e Tretë, që do të thotë me fillu prap nga 0″, tha Lekaj.
