Për disa orë, Policia e Kosovës zhvilloi një aksion në katër lokacione në Prishtinë.
Dy shtëpi dhe banesa private, një lokal afarist dhe një zyre u bastisën nga zyrtarët policor.
Kjo pasi dy zyrtar të Ministrisë së Punëve të Brendshme dhe dy punëtor të një kompanie të armëve, dyshohet se bënë dallavere gjatë dhënies së lejeve të armëve.
Të arrestuarit dyshohet se lëshuan leje për persona të ndryshëm, pa qenë ata prezentë.
“Lidhur me rastin dyshohet se katër persona të dyshuar (nga ta tre meshkuj kosovarë dhe një femër kosovare) janë përfshirë në veprat penale të lartcekura, duke marrë ryshfet nga persona të ndryshëm të cilët janë pajisur me certifikatë për leje të armës pa prezencën e tyre, siç e parasheh ligji dhe procedurat tjera vijuese”, thuhet në njoftimin e Policisë së Kosovës.
Policia ka bërë të ditur se gjatë kontrollit janë sekuestruar përkohësisht, 7 telefona celularë, dosje dhe dokumente relevante që lidhen me rastin.
Personat e dyshuar pas intervistimin janë dërguar në mbajtje për 48 orë.
“Gjatë ekzekutimit të urdhër-kontrollit janë sekuestruar disa dokumente të nevojshme, të cilat do të shërbejnë për zhvillimin e mëtejmë të hetimeve lidhur me këtë çështje penale. Prokurori i Shtetit, brenda afatit ligjor, do të parashtrojë kërkesë për caktimin e masës të sigurisë ndaj të pandehurve”, kanë njoftuar ngë Prokuroria Themelore në Prishtinë.
Nga kompania e armëve Reload kanë konfirmuar për televizionin se dy nga të arrestuarit janë punëtor të tyre, mirëpo kanë thënë se rasti nuk ka të bëjë asgjë me kompaninë.
Ata nuk kanë dashur që të flasin para kamerës.
