Grupi Parlamentar i Lidhjes Demokratike të Kosovës (LDK) ka mbajtur mbledhjen e radhës, ku janë diskutuar zhvillimet e fundit politike në vend, me fokus të veçantë pas aktgjykimit të Gjykata Kushtetuese e Kosovës.
Sipas LDK-së, ky aktgjykim ka sjellë qartësi juridike dhe ka rikthyer procesin institucional brenda kornizës kushtetuese, duke përcaktuar hapat që duhet të ndjekin institucionet në vazhdim.
Në komunikatë, LDK ka riafirmuar qëndrimin për respektim të plotë të rendit kushtetues, funksionim normal të institucioneve dhe ruajtje të balancës demokratike. Sipas tyre, veprimet politike në këtë fazë duhet të udhëhiqen nga përgjegjësia shtetërore dhe jo nga interesa partiake.
LDK thekson se zgjedhja e Presidentit nuk mund të bëhet përmes improvizimeve procedurale, por vetëm përmes një marrëveshjeje të mirëfilltë politike që garanton unitet institucional dhe përfaqësim gjithëpërfshirës. Në të kundërtën, çdo përpjekje tjetër, sipas tyre, është e destinuar të dështojë.
Tutje, partia vlerëson se përgjegjësia për arritjen e kësaj marrëveshjeje i takon partisë së parë, ndërsa paralajmëron se çdo dështim do të ketë pasoja politike, përfshirë edhe mundësinë e shkuarjes në zgjedhje.
LDK ka bërë të ditur se në rast të zgjedhjeve të reja, do të garojë e bashkuar dhe e gatshme për të kërkuar besimin e qytetarëve./teve1.info/
