LDK-ja përmes një komunikate për media tha se mbrëmë kanë kuptuar se institucionet nuk janë koordinuar me askënd dhe sipas tyre nuk kanë qenë të përgatitur për situatën e djeshme, teksa ngjarjen e djeshme e kanë quajtur të dështuar, raporton teve1.info
“Lidhja Demokratike e Kosovës dje, i dha mbështetje institucioneve të Republikës së Kosovës në lidhje me shtrirjen e ligjshmërisë në gjithë territorin e vendit. Dënuam sulmin ndaj Policisë së Kosovës që po ushtronte mandatin e saj kushtetues. Kërkuam koordinim me bashkësinë ndërkombëtare dhe theksuam që Kosovës në këto momente i duhen më së shumti siguria dhe qetësia. Nga dështimi i mbrëmshëm, kuptuam që institucionet nuk janë koordinuar me askënd dhe se nuk kanë qenë të përgatitura për situatën e djeshme”, thuhet në komunikatë.
LDK ka kritikuar edhe takimin e ftuar nga presidentja, Vjosa Osmani takim ky i cili u bojkotua nga opozita.
“Ndërsa sot, pas dështimit, Presidentja ftoi në takim partitë opozitare me Qeverinë. Për çfarë? Për të mbuluar dështimin dhe papërgjegjësinë? Opozita duhet të konsultohet dhe të dëgjohet para se të ndërmerren veprimet. Opozita mund të ndihmojë Qeverinë që të mos gabojë, por nuk mund të marrë përsipër dështimet e saj”, thuhet në komunikatë.
LDK tutje ka shtuar se e mbështesin vendosjen e reciprocitetit, si masë e drejtë e çdo shteti sovran.
“Mbështesim vendosjen e reciprocitetit, si masë e drejtë e çdo shteti sovran. Në të njëjtën kohë, koordinimi me aleatët tanë është kërkesë e përhershme e Lidhjes Demokratike të Kosovës. Ky koordinim është kushti i vetëm i suksesit”
