Lidhja Demokratike e Kosovës (LDKK) ka thënë se po i përcjellë me llupë veprimet e Qeverisë, që sipas saj, me anë të propagandës po bën keqpërdorime.
LDK-ja e ka akuzuar Qeverinë për lëshimin e kontratave sekrete në vlerë prej 209 milionë eurove.
Më tej thuhet se kjo parti ka kërkuar përballje në Kuvend dhe themelimin e Komisionit Hetimor, por sipas saj, pushteti po i ikë kësaj përgjegjësie.
“Sipas listës së Komisionit Rregullativ të Prokurimit Publik për vetëm tri vjet qeverisje, pushteti ka dhënë plot 781 tenderë sekretë, që do të thotë ka dhënë tenderë sekretë në vlerë prej 209 milionë euro. Pra çdo ditë pune pushteti jep 1 tender sekret. Kjo është e vërteta, dhe jo vetëm kaq”, thuhet në komunikatë.
Ndërkohë, LDK-ja vlerëson se rritja e “tenderëve sekretë” është shqetësues për shkak të përdorimit të parasë publike.
“Nga viti i parë sa ishte 30 milionë euro, në vitin e dytë u bënë 70 milionë; përderisa në vitin e tretë janë bërë gjithsej 109 milionë euro. Ndërsa vetëm gjatë javës së fundit janë nënshkruar 7 tenderë sekretë, në vlerë prej 4.1 milionë euro. Nga 781 tenderë sekretë, tani janë 788, ndërsa nga 209 milionë euro, tashmë janë 213 milionë euro. Pra nga 1 milion euro në ditë po i jep kjo Qeveri”, thuhet në njoftim.
Gjithashtu, kërkohet sqarim për përdorimin e parasë publike./teve1.info/
