Kjo parti ka kërkuar nga Qeveria dhe nga partia në pushtet që të funksionalizojë këto tri institucione .
Shkëmb Manaj, nga kjo parti në një konferencë për media të hënën ka thënë se mosfunksionimi i OSHP-së, ka bërë që komunat nuk kanë mundur të shfrytëzojnë fondet për shumë projekte të cilat janë me rëndësi për qytetarët.
“Qeveria e Kosovës, respektivisht shumica parlamentare për afro 1 vit kanë lënë jashtë funksionit institucione të pavarura si Organin Shqyrtues të Prokurimit Publik, Autoritetin Kosovar të Konkurrencës, si dhe Bordin e Ankesave në Komisionin e Pavarur të Mediave. Si pasojë e mbetjes jashtë funksionit të OSHP-së, komunat kanë mbetur pa shfrytëzuar projekte qindra miliona euro që ndikojnë drejtpërdrejt te qytetarët, bizneset dhe në zvogëlimin e vendeve të punës në sektorin privat. Vetëm Komuna e Prishtinës nga mosfunksionalizimi i këtij institucioni deri më tani ka të bllokuara mbi 13 milionë euro”, ka thënë ai.
Manaj ka folur edhe për Autoritetin Kosova të Konkurrencës, mungesa e të cilit sipas tij në këtë kohë rrezikon që të ketë ngritje të çmimeve në kundërshtim me legjislacionin në fuqi.
“Në këtë kohë kur ngritja e çmimeve të energjisë dhe produkteve ushqimore ka kapluar vendin tonë, të cilat kanë ndikim të drejtpërdrejtë në jetën dhe mirëqenien sociale të familjeve, mungesa e AKK-së rrezikon që këto çmime të ngritën në kundërshtim të plotë me legjislacionin në fuqi”, ka shtuar ai./Tëve1.info/
