Sibel Halimi, zëdhënëse e LDK-së të martën në një konferencë për media tha u punësuan 128 militantë e të afërm të Vetëvendosjes.
Ajo kërkoi që konkursi të anulohet.
“Rasti i fundit është ku aplikuan 4.668 persona e u punësuan 128 militantë e të afërm të VV-së. Kërkojmë që një trend si ky të ndërpritet. LDK-ja kërkon që ky konkurs të anulohet menjëherë.
Shkarkim dhe suspendim i të gjithë zyrtarëve në KEK. Ftojmë prokurorinë që të hetojë”, tha Halimi në një konferencë për media.
Për dyshimet rreth punësimit është deklaruar edhe KEK-u.
Përmes një komunikate thuhet se janë duke përcjellë me seriozitet të gjitha pretendimet.
“Pavarësisht faktit se KEK ka bërë përpjekje për të respektuar kriteret e shpalljes publike si dhe dispozitat ligjore të Ligjit të Punës në fuqi dhe detyrimeve ligjore të dala nga aktet nënligjore për çështjen e rekrutimit të punëmarrësve, KEK është duke përcjellë me seriozitet të gjitha pretendimet publike rreth shkeljeve eventuale gjatë procesit të rekrutimit”, thuhet në komunikatë.
