I pyetur nëse duhet të jep dorëheqje Ministri i Shëndetësisë, Rifat Latifi, Hyseni thotë se të gjitha këto dështime janë të mjaftueshme që një ministër të jep dorëheqje, shkruan teve1.info.
“Ne mendojmë se të gjitha këto dështime, investimet kapitale, ilaçet, punëtorët shëndetësor janë fakte të mjaftueshme që një ministër cilado qoftë duhet të jep dorëheqje”, tha Hyseni.
Në një konferencë për media, Hyseni ka thënë se janë shpenzuar vetëm 5 për qind e buxhetit për 6 mujorin e parë për investimet kapitale.
“Në kohën e kësaj qeverisje është ulur buxheti rreth 60 milionë për Ministrinë e Shëndetësisë në të cilën nga 15 projekte kapitale sa janë gjithësie për vitin 2022, vetëm dy prej tyre kanë filluar realizimin dhe janë vetëm në faza fillestare, pra është shpenzuar vetëm 5 për qind e buxhetit për 6 mujorin e parë e buxhetit për investime kapitale nga 10 milionë 63 mijë euro sa kanë qenë gjithsej”,tha ai.
Si problem të madh, Hyseni e cilësoi ikjen e profesionistëve shëndetësor nga vendi si dhe mos vazhdimin e kontratave të 1000 mjekëve që kanë shërbyer në kohë të pandemisë.
“Janë mbi 120 profesionistë shëndetësor të cilët e kanë lënë vendin dhe ndër ta kemi edhe 40 specializantë. Është kjo qeveri që javë më parë nuk u vazhdoj kontrata mbi 1000 profesionistëve shëndetësor të cilët i kishim shtyllë e shërbimeve shëndetësore gjatë pandemisë. Në periudhën janar – maj 2022 janë mbi 520 qytetarë të cilët kanë kërkuar shërim jashtë vendit po në këtë kohë, në kohën e kësaj qeverisje pas largimit të shumë profesionistëve shëndetësor, mjekëve dhe infermiereve. Kemi vetëm 48 anesteziolog në krejt QKUK-në që do të thotë se lista e pritjes për operacione do të zgjatet nëse vazhdon me këtë ritëm të ikjes së këtyre profesionistëve ose do t’i stërngarkojmë këta profesionistëve që na kanë mbetur”, tha ai.
Tutje LDK në këtë konferencë për media i ka bërë thirrje qeverisë që probleme të lartëpërmeduar t’u jep përgjigje konkrete duke i realizuar.
“Kësaj qeveri sot i bëjmë thirrje dhe i themi provo me digju, provo me mësu, puno përndryshe do të mbeteni vula e dështimit dhe e dëmtimit të shëndetit të qytetarëve. Ju bëjmë thirrje që këtyre problemeve të ju jepim përgjigje konkrete duke i realizuar dhe duke ju ofruar shërbime qytetarëve të cilat janë të domosdoshme”, u tha në fund të konferencës së LDK-së./Teve1.info/
