Lidhja Demokratike e Kosovës vlerëson që përzgjedhja e Rilind Gërvallës Drejtor në kanalet shqip në RTK, përbën një kapje të plotë të këtij institucioni publik.
Madje sipas LDK-së kjo përzgjedhje shpërfaq qartazi edhe “tendencën e pushtetit për të institucionalizuar propagandën partiake në kanale publike të informimit”.
“Informimi i pavarur publik, nga një institucion i financuar nga fondet publike, përbën bazën e një demokracie të shëndoshë dhe të qëndrueshme. RTK-ja, duhet të ketë rol thelbësor në informimin e pavarur dhe të drejtë të të gjithë qytetarëve të Kosovës; dhe ky rol ushtrohet kur pushtetet nuk përcaktojnë politikat editoriale të kanaleve informuese e nuk vendosin aktivistët e tyre partiak në krye të këtyre institucioneve”, thuhet në një komunikatë të LDK-së.
Subjekti politik opozitar ka kërkuar që të anulohet përzgjedhja e tij në krye të kanaleve shqip në RTK.
“Prandaj, Lidhja Demokratike e Kosovës kërkon anulimin e menjëhershëm të përzgjedhjes në fjalë dhe do të ngrisë temën e kapjes së institucionit të televizionit publik, në Komisionin përkatës parlamentar në Kuvendin e Republikës së Kosovës”, thuhet në komunikatë.
