Si e kundërligjshme po shihet nga LDK-ja në Gjilan, kërkesa e kryetarit të kësaj komune për shpërbërje të Kuvendit Komunal. E partia tjetër opozitare, PDK, kërkon dorëheqjen e Hysenit.
I pari i Gjilanit Alban Hyseni, kërkoi shpërbërjen e Kuvendit Komunal të Gjilanit.
Arsyeja, nuk po përmbushen detyrat dhe obligimet ligjore të komunës.
Një kërkesë e tillë po kundërshtohet nga partitë opozitare.
Sipas LDK-së, kjo kërkesë e Hysenit nuk është e bazuar në ligj.
Nga ana tjetër, PDK-ja, konsideron se kryetari i komunës, fillimisht duhet të japë dorëheqje.
Komuna e Gjilanit ka dështuar disa herë të votojë buxhetin e mbetur nga viti 2023, ngase opozita nuk ka marrë pjesë në votim, me arsyetimin se nuk votojnë diçka, përmbajtjen e së cilës nuk janë konsultuar.
