Lidhja Demokratike e Kosovës (LDK), ka kundërshtuar paralajmërimet për rritje të çmimit të rrymës prej 15 për qind.
Ky subjekt politik ka kritikuar edhe qeverinë të cilën e ka cilësuar si të paaftë në menaxhimin e këtij sektori.
Nga kjo pari është thënë se vendimi për rritje të këtij çmimi është i papranueshëm, dhe se pushteti po i godet qytetarët duke rritur koston e jetesës.
‘‘Rritja e fundit e çmimit të energjisë elektrike është jo vetëm e padrejtë dhe e pajustifikueshme, por dhe e dëmshme për interesin e përgjithshëm. Për më tepër, kjo Qeveri po e përdor ZRrE-në si instrument për t’ua imponuar qytetarëve koston e dështimeve të saj qeverisëse dhe mungesës së vizionit për zhvillim të qëndrueshëm ekonomik’’, thuhet mes tjerash në reagimin e LDK-së.
Tutje, nga kjo parti është deklaruar edhe se, rritja e çmimit të energjisë është goditje e standardit jetësor të qytetarëve.
“Kosova meriton një qeverisje kompetente dhe me vizion, jo një pushtet që e trajton popullin si barrë. LDK do të vazhdojë të jetë zë i fuqishëm në mbrojtje të interesit qytetar dhe do të kundërshtojë me të gjitha mjetet demokratike çdo politikë që rëndon padrejtësisht mbi ta”, thuhet mes tjerash./teve1.info/
