Grupi Parlamentar i Lidhjes Demokratike të Kosovës (LDK), të enjten e ka dorëzuar në Gjykatën Kushtetuese të Kosovës plotësim/ndryshimet në Ligjin për zyrtarët publikë.
Deputeti i Lidhjes Demokratike të Kosovës, Armend Zemaj, ka deklaruar se ky subjekt politik mendon se nuk duhet të lejohet ekzistimi i një administrate të politizuar e cila sipas tyre e dëmton jo vetëm atë, por edhe ecjen e Kosovës drejt integrimeve Evropiane.
“Një ligj i cili ka kaluar nëpër Kuvendin e Kosovës dhe i cili po ashtu ka qenë si vendim i Gjykatës Kushtetuese për papranueshmërinë e disa akteve të cilat kanë të bëjnë më ndërhyrjen direkte në Administratën Publike në logjikën e pushtetit të Vetëvendosjes për kapjen e zyrtarëve publik ta quaj kështu, dhe politizimin e skajshëm i cili e dëmton edhe Administratën në tërësi por e dëmton edhe ecjen e Kosovës drejt integrimeve Evropiane që ka qenë edhe detyrë e jona në vazhdimësi mbi të gjitha kanë qenë edhe kërkesë e partnerëve evropian si mbështetës të kësaj fushe. LDK mendon që ne nuk duhet të lejojmë që të kemi një administratë tërësisht të politizuar sidomos një administrate e cila është investuar shumë që të jetë e pavarur të ushtrojë detyrat e tyre sipas ligjeve dhe Kushtetutës së Republikës së Kosovës dhe në kuptimin e saj të jetë vazhdimësi e një performance të mirë e jo vazhdimësi e tendencës së partive subjekteve politike që të kemi një politizim dhe një dëmtim mbi të gjitha për interesa klienteliste dhe afera të mëdha korruptive siç kanë ndodh në këto katër vite të këtij pushteti”, ka thënë Zemaj.
Ndryshe, më 30 tetor, deputetët e pushtetit miratuan ndryshimet në Ligjin për zyrtarët publikë, që mes tjerash, lejojnë mbajtjen e pozitës së ushtruesve të detyrës një vjet plus një vjet, nga 6 plus 6 muaj sa është tash./teve1.info/
