Ish-deputeti i LDK-së, Adem Salihaj, ka komentuar në emisionin “Mesditë” në Tëvë1 performancën e LDK-së në zgjedhjet e dhjetorit, ku partia renditet e treta me 13% të votave.
Salihaj ka theksuar se rënia e LDK-së është shqetësuese dhe ka folur për vendimet që sipas tij duhej të merren më parë nga udhëheqësia e partisë.
“Unë në atë kohë, kur kam qenë në këtë studio, kisha bërë një postim ku kërkoja që edhe Lumir Abdixhiku, sikurse kryetari i PDK-së, të ofronte dorëheqje. LDK kishte rënë nga 9 komunat në 7, dhe problemi më i madh ishte tendenca për rënie të vazhdueshme. Për të mirën e LDK-së kërkova dorëheqjen e kryetarit, sepse problemi do të vinte më vonë. Për fat të keq, LDK-ja pati një rënie tragjike, e cila krijon një hendikep të madh për partinë që të ringrihet. Problemi është shumë serioz, dhe besimi në parti ka rënë dukshëm. Më vjen shumë keq që një parti që ka qenë shtylla e lirisë dhe pavarësisë së Kosovës tash është në gjendje të marrë vetëm 13%.”, ka thënë Salihaj.
Ai shtoi se dorëheqja e hershme e kryetarit mund të kishte ndryshuar situatën
“Po të kishte dhënë dorëheqjen kryetari i LDK-së para zgjedhjeve, besoj se rënia nuk do të ishte kaq e madhe.”, u shpreh tutje ai.
Salihaj nënvizoi rëndësinë e reflektimit të udhëheqësisë dhe nevojën për strategji që të rikthehet besimi i qytetarëve në LDK.
