Kërkohet distancim i qeveritarëve nga zyrtarët që janë të përfshirë në afera korruptive. Për aferat me energjinë elektrike dhe rezervat shtetërore, opozita shprehet se për intervistë nga Prokuroria Speciale, mund të thirret edhe kryeministri Kurti, si bartës i funksionit më të lartë qeveritar.
Skandali me shit – blerjen energjisë elektrike kishte përfshirë ambasadorin Martin Berishaj.
Kjo u pasua me aferën e rezervave shtetërore, në ministrinë e Rozeta Hajdarit.
Pas kësaj, afera e KEK-ut, për blerje të energjisë elektrike me ish kryeshefin e saj, Nagip Krasniqi.
Të tre këta zyrtarë, veçse janë thirrur për intervistë nga ana e Prokurorisë Speciale.
Për këto skandale sic i quan opozita, që ndodhën gjatë qeverisjes Kurti, beson se i intervistuari i radhës do të jetë edhe kryeministri Kurti.
“Një ditë prej ditësh, Albin Kurti do të jetë njëri nga të intervistuarit e Prokurorisë Speciale, nga detyrimet e veta që i ka edhe nga detyrimet që kanë me i dalë Prokurorisë Speciale për ta thirrë në intervistë, pse ai është përfshirë në tërë këto raste dhe nuk ka bërë asnjë denoncim dhe mos me thanë që nuk e ka bërë asnjë shkarkim, se është marre me atë punë, madje i ka mbrojtë me ortodoksizëm”, tha deputeti i LDK-së, Driton Selmanaj.
Ndaj Berishajt, Hajdarit e Krasniqit, kërkohet që gjuha e akterëve qeveritarë të jetë distancuese, për shkak të mosndërhyrjes në drejtësi.
“Qeveria dhe zyrtarët qeveritarë duhet të përmbahen nga deklaratat të cilat i japin për zyrtarët e vet që janë duke u hetuar për vepra të ndryshme penale. Në lidhje me deklarimet që i bën Qeveria për këta zyrtarë që janë duke u hetuar apo mbrojtjen që ua bën ndaj zyrtarëve që janë duke u hetuar, kujtojmë rastin e Nagip Krasniqit që e mbronin në seancën e Kuvendit, ka dhënë vërejtje edhe raporti i Progresit”, tha Flamur Kabashi nga IKD-ja.
Nagip Krasniqi dyshohet për keqpërdorim të detyrës zyrtare, nga 15 tetor 2021 deri më 19 prill 2023.
