Për rreth tri vite ka bërë përpjekje për ti normalizuar marrëdhëniet në mes Kosovës dhe Serbisë si i dërguar i posaçëm i Shteteve të Bashkuara të Amerikës për Ballkanin Perëndimor,
Madje gjatë kësaj periudhe, emisari Gabriel Escobar ka bërë edhe deklarata të forta në drejtim të palëve.
Mirëpo në këtë post Escobar do të jetë vetëm edhe disa javë.
Por sipas një përgjigje për Tëvë1 të Annie Verderosa, oficere e medieve nga Byroja e Çështjeve Evropiane dhe Euroaziatike, Escobar nuk është shkarkuar vetëm ka ndërruar detyrën me rotacion.
“Zëvendës Ndihmës Sekretari Gabriel Escobar nuk është shkarkuar nga posti i tij. Të gjithë oficerët e Shërbimit të Jashtëm në karrierë i ndërrojnë detyrat me rotacion çdo një deri në katër vjet si një praktikë e rregullt. Si oficer karriere i Shërbimit të Jashtëm, Zëvendës Ndihmës Sekretari Escobar ka shërbyer në rolin e tij aktual për tre vjet dhe pritet për një kalim të planifikuar prej kohësh në detyrën e tij të ardhshme në javët në vijim. Deri në tranzicionin e tij të planifikuar, ai mbetet në rolin e tij si Zëvendës Ndihmës Sekretar dhe i Dërguari Special në zyrën e Çështjeve Evropiane dhe Euroaziatike si dhe i Dërguari Special për Çështjet e Ballkanit Perëndimor”, ka thënë ajo.
Në këtë përgjigje për Tëvë1, nga DASH-i thonë se SHBA-ja mbështet dialogun e lehtësuar nga Bashkimi Evropian.
Largimin e Escobarit si një procedurë normale po e sheh njohësi i procesit të dialogut, Artan Muhaxhiri.
Sipas Muhaxhirit edhe pas largimit të Escobarit dhe ardhjen e një emisari të ri, politika amerikane nuk ndryshon kundrejt dialogut.
“Procesi i dialogut në mes Kosovës dhe Serbisë është shumë i rëndësishëm për Shtetet e Bashkuara të Amerikës dhe është krejtësisht naive të mendohet që një person, një individ mund ta devijojë mund ta orientojë sipas dëshirave të veta, ky është një proces shumë kompleks, shumë delikat dhe mendoj që edhe me largimin e zotëri Escobar dhe me ardhjen eventuale të një emisari tjetër nuk do të ndryshojë politika amerikane ndaj procesit të dialogut”
Muhaxhiri thotë se Kosova dhe Serbia nuk po arrijnë një marrëveshje dhe në mungesë të saj po kërkojnë fajtor për lëshimet e veta.
“Ideja kryesore e Kosovës dhe Serbisë ka qenë që ta gjejnë një fajtor kujdestar për lëshimet e veta, për paaftësinë e tyre që të gjejnë kompromise të gjejnë vullnet, guxim që t’i tejkalojnë barrierat dhe të arrijnë marrëveshjen. Pra ka qenë e pa menduar mirë sepse Kosova do të duhej të bënte çmos që të arrinte këtë marrëveshje, pa këtë marrëveshje ka vetëm bllokadë, ka vetëm izolim ka vetëm stagnim, ndërsa me arritjen e marrëveshjes do të hapeshin horizonte të reja edhe politike edhe ekonomike edhe zhvillimore për Kosovën. Por kjo gjë nuk ka ndodhë dhe tani kërkohet fajtori kryesor, mund të jetë Lajcaku, mund të jetë Borelli mirëpo unë jam absolutisht i bindur që ky është një naivitet dhe që asgjë substanciale nuk do të ndryshoj edhe nëse vjen Pahori në vendin e Lajcakut nuk do të ketë ndryshime radikale në ecurinë dhe në stilin e dialogimit i cili ka qenë deri më tani”, ka thënë ai.
Ende nuk ka një emër se kush mund të zëvendësoj emisarin për Ballkanin Perëndimor, Gabriel Escobar.
