Me largimin gradual të masave ndëshkuese të Bashkimit Evropian janë zhbllokuar fonde për Kosovën nga Korniza Investuese për Ballkanin Perëndimor (WBIF), thonë në qeverinë në detyrë.
Sipas tyre, pas rifillimit të mbajtjes së takimeve në kuadër të nënkomiteteve të Marrëveshjes së Stabilizim-Asocimit (MSA) janë aprovuar edhe projekte me të cilat Kosova ka aplikuar në fusha si energjia apo digjitalizimi.
Masat ndëshkuese ndaj Kosovës janë vendosur në vitin 2023 pas tensioneve në veri të vendit. Fillimi gradual i tyre ka nisur tek në muajin korrik të këtij viti, pas paralajmërimit të bërë nga përfaqësuesja e lartë e BE-së për Politikë të Jashtme, Kaja Kallas.
Në lidhje me projektet konkrete që Kosova ka përfituar me largimin gradual të masave ndëshkuese nuk u përgjigjën në Bashkimin Evropian.
Mirëpo, Klisman Kadiu, këshilltar i zëvendëskryeministrit në detyrë për Integrime Evropiane, Besnik Bislimi, thotë për KosovaPress, se BE-ja ka zhbllokuar fonde për Kosovën e ka aprovuar projekte të reja.
Ai ritheksoi se Kosova ka përmbushur të gjitha hapat e kërkuar nga BE-ja për heqjen e masave, andaj unioni evropian duhet t’i heqë të njëjtat sa më parë.
“Që në krye të herës, Kosova i ka përmbushur hapat e kërkuar nga Bashkimi Evropian për heqjen e masave, bazuar në marrëveshjen e Bratisllavës të 10 korrikut 2023. Edhe pse rekomandimi për heqjen e masave nga Bashkimi Evropian erdhi para një viti, fillimi i largimit të tyre nisi nga korriku i kaluar. Me largimin gradual të masave tashmë kanë rifilluar të mbahen takimet në kuadër të nënkomiteteve të Marrëveshjes së Stabilizim-Asocimit, janë zhbllokuar fonde nga Korniza Investuese për Ballkanin Perëndimor (ËBIF) e aprovuar projekte me të cilat kemi aplikuar në fusha si energjia apo digjitalizimi. Qeveria e Republikës së Kosovës rithekson se masat e padrejta të vendosura ndaj vendit duhet të hiqen në tërësi e sa më parë”, thotë Kadiu për KosovaPress.
Në anën tjetër, analisti Visar Imeri, thotë për KosovaPress, se vendi po humb shumë për shkak të masave.
Sipas tij, me largimin gradual të tyre s’po shihen përfitimet, pasi në Kosovë ka një stagnim të madh ekonomik.
“Kosova po humb shumë për shkak të shumës që nuk po investohet në Kosovë të cilat kanë qenë të planifikuara. Po ashtu edhe për shkak të kohëzgjatjes sepse është krejt ndryshe të kishim ato para në fillim të vitit të kaluar e krejt ndryshe t’i marrim pas tri vjetësh. Të gjitha vendet tjera, përfshirë edhe vendet e BE-së ecin tutje, kurse Kosova po stagnon. Këto janë një shumë e dobishme e parave, diku 600–700 milionë para që janë të bllokuara për shkak të sanksioneve. Kur i shtojmë këtu edhe paratë që po presin nga Plani i Rritjes së BE-së që Kosova ende s’ka mundur t’i marrë për shkak që s’kemi institucione funksionale… Kemi një stagnim të madh ekonomik dhe në këtë drejtim Kosova është një prej vendeve të rajonit që do të kishte më shumë nevojë”, deklaron ai.
Masat ndaj Kosovës ishin vendosur në vitin 2023, si përgjigje ndaj përshkallëzimit të situatës së sigurisë në veri të Kosovës, kur kryetarët shqiptarë, të dalë nga zgjedhjet që u bojkotuan nga serbët lokalë, nisën detyrën e tyre në komunat në veri.
Deputeti i Lidhjes Demokratike të Kosovës (LDK), Avdullah Hoti, ka bërë të ditur se masat e vendosura nga Bashkimi Evropian ndaj Kosovës, për periudhën qershor 2023 – prill 2025 kanë një kosto të përgjithshme prej 613.4 milionë euro.
