Sekretari i jashtëm i Mbretërisë së Bashkuar, David Lammy, është takuar sot me presidenten e Kosovës, Vjosa Osmani.
Pas takimit, Lammy në konferencë për media tha se Britania e Madhe dëshiron të ketë një normalizim të qëndrueshëm mes Kosovës dhe Serbisë, duke shtuar se shpreson edhe angazhim në dialog nga qeveria e ardhshme.
“Janë disa gjëra që duam t’i shohim. Normalizim të qëndrueshëm mes Kosovës dhe Serbisë. Shpresoj që qeveria e ardhshme i adreson nevojat e gjithë qytetarëve, përfshirë progresin në integrimin e serbëve në Kosovë dhe angazhimin e fuqishëm në dialogun e udhëhequr nga BE-ja”, ka thënë Lammy.
Ai ka thënë se është me rëndësi që të shihet përparimi i Kosovës në udhëtimin euroatlantik, derisa deklaroi se me mbështetjen e Mbretërisë së Bashkuar shpresohet që të anëtarësohet në Këshillin e Evropës.
Ndërkohë, Lammy tha se Mbretëria e Bashkuar mirëpret progresin që vendi ka bërë në organizimin e zgjedhjeve dhe shpreson ne formimin sa më të shpejt të qeverisë së re./teve1.info/
