Milot Rashica pritet të largohet nga Beshiktashi edhe pse agjenti i tij kishte mohuar një gjë të tillë javë më parë.
Te Beshiktashi janë të vendosur për ta shitur Rashicën, të cilin tashmë e ka nxjerrë në shitje dhe është në pritje të ofertave për sulmuesin e krahut.
Trajneri Ole-Gunnar Solskjaer nuk llogarit në Rashicën, i cili nuk ka treguar formë të mirë në fazën përgatitore dhe tashmë ka dhënë dritën e gjelbër për largimin e tij.
29-vjeçari është pjesë e klubit turk prej vitit 2023 dhe sezonin e shkuar në 41 ndeshje të luajtura shënoi 5 gola e bëri 2 asistime.
Ai ka kontratë deri në vitin 2027 me Beshiktashin, ekip që për ta lënë të lirë po kërkon të paktën 10 milionë euro.
Në këtë verë, është përfolur shumë për një transferim të Rashicës në Bundesligën e Gjermanisë dhe Serie A të Italisë.
