Konjufca nuk ka kandiduar për ndonjërën pozitë për të cilën votohet sot në Lëvizjen Vetëvendosje.
Konjufca ka thënë se zgjedhjet brendapartiake janë një tregues themelor për të eksploruar autenticitetin e demokratizimit dhe decentralizimit të partive politike, shkruan teve1.info
Tutje ai ka thënë se Lëvizja Vetëvendosje është më e fortë se kurdoherë më parë dhe sipas tij Vetëvendosja po tregon për herë të katërt demokracinë e saj të brendshme.
“Zgjedhjet brendapartiake janë një tregues themelor për të eksploruar autenticitetin e demokratizimit dhe decentralizimit të partive politike. Lëvizja VETËVENDOSJE sot është më e fortë se kurdoherë më parë dhe po tregon për të katërtën herë demokracinë e saj të brendshme progresive dhe të shëndetshme. Sot po përfundon procesi i votimit në 43 qendra të Lëvizjes VETËVENDOSJE në nivele të ndryshme të zgjedhjeve, dhe ne sapo e kryem obligimin tonë partiak dhe qytetar”, ka shkurar ai.
Konjufca theksoi se Albin Kurti nuk ka kundërkandidat jo për shkak të asaj se çfarë thonë “oponentët politik” por sipas tij ky ishte qëndrimi i të gjithë anëtarëve të partisë së tij.
Konjufca tha se kandidimi i dikujt vetëm sa për sy e faqe nuk i shërben demokracisë po vetëm e dëmton.
“Për Kryetar të VETËVENDOSJE, sot vetëm Albin Kurti nuk ka kundërkandidat. Jo për shkak të asaj që thonë oponentët tanë politikë, por sepse ky ishte qëndrimi i të gjithë anëtarëve tanë të partisë, pa përjashtim. Shtoja kësaj që, kandidimi i dikujt vetëm sa për sy e faqe, nuk i shërben demokracisë, por përkundrazi e dëmton seriozisht atë”, ka thënë ai.
Ndryshe, Lëvizja Vetëvendosje sot është duke e mbajtur procesin e brendshëm zgjedhor. Qendrat e votimit janë hapur në orën dhjetë dhe do të mbyllen në orën 19:00.
Votën e tij tashmë e ka dhënë edhe kryeministri Albin Kurti, njëherit kandidati i vetëm sërish edhe për një mandat në krye të LVV-së./teve1.info
