Përmes një postimi në Facebook, KRU “Mitrovica” ka njoftuar se pavarësisht rënies së nivelit të ujit ditën e premte, Impiantet për trajtimin e Ujit nuk janë kthyer në punë.
“Në bazë të informatave të fundit nga Impiantet për Trajtimin e Ujit mund të u informojmë se përkundër faktit se kemi rënie të nivelit të ujit dhe rënie të nivelit të turbiditetit të ujit të papërpunuar ende nuk janë krijuar kushtet për rifillimin e prodhimit të ujit.
Impiantet për Trajtimin e Ujit (ITU)
– Në ITU Shipol niveli i turbiditetit ka rënie të dukshme dhe nëse vazhdon me këtë ritëm, atëherë ekziston mundësia që në orët e pasdites të fillojmë me punë por duke përdorur kapacitetet minimale të prodhimit të ujit.
– Ndërsa në ITU-në në Balinc niveli i turbiditetit edhe pse është më i ulët se dje, prapë se prapë është në nivelin i cili na pamundëson operimin e Impiantit, respektivisht prodhimin e ujit”, thuhet në njoftim.
KRU “Mitrovica” ka bërë thirrje për kujdes në përdorimin e ujit, pasi sipas kësaj kompanie, uji është i kontaminuar.
“Po ashtu, po ua rikujtojmë edhe njëherë se për shkak të vërshimeve të mëdha ekziston mundësia e kontaminimit të ujit në gypat e ujit në lokacione të ndryshme prandaj duhet të bëni kujdes dhe ujin mos t’a konsumoni pa e vluar e në raste të dyshimta edhe të shmangni përdorimin e tij për pije.
Për çdo zhvillim të ri në lidhje me furnizimin me ujë, do u informojmë me kohë.
Ju faleminderit për bashkëpunimin dhe mirëkuptimin tuaj!”, thuhet në njoftim.
